Ikipe y’igihugu y’u Burundi ‘Intamba mu Rugamba’ irashaka gusubira mu gikombe cya Afurika cya 2022 kizabera muri Cameroun ngo bagaragaze ko ubwo baherukayo bitari ibyabagwiririye, nk'uko byatangajwe na kapiteni wabo Saido Berahino.
Mu irushanwa riheruka rya 2019 ryabereye mu Misiri, nibwo bwa mbere u Burundi bwari bugeze mu mikino ya nyuma y'igikombe cya Afurika.
Berahino yabwiye BBC Sport Africa ati: "Twarakoze cyane ngo tube turi ku mwanya turiho ubu.
"Nyuma yo kugera muri iri rushanwa bwa mbere mu mateka, turashaka kwereka abantu ko bitari ibyatugwiririye.
Mu Misiri aho Intamba zari mu itsinda rimwe na Madagascar, Guinea na Nigeria, zasoje ari iza nyuma mu itsinda, zitsinzwe imikino yazo itatu yose.
Berahino wakiniye abatarengeje imyaka 20 b'u Bwongereza mbere yo guhindura agakinira igihugu cye cy'amavuko, avuga ko kumenya icyanga cy'iri rushanwa bizabafasha kugerageza kugera no muri Cameroun.
Yagize ati: "Turashaka kugera muri iyi mikino na none kuko dufite inyota, dufite n'ubushake.
"Kandi tuzi uko iri rushanwa rimera, rero byaba ari byiza cyane gusubirayo, kujyayo kabiri twikurikiranya tukagerageza kwitwara neza kurusha ubushize.
"Dufite amahirwe yose".
Intamba ubu ni iza gatatu mu itsinda E, zirarushwa inota rimwe na Mauritania. Zisigaje guhura na Centrafrique na Maroc iyoboye iri tsinda, yo isa n'iyizeye kubona tike kuri iyi mikino ibiri isigaye.
Abarundi bafite intego yo gusubira muri CAN bikurikiranya
Eng
RSS 
TANGA IGITECYEREZO