Mbere yo gukina umukino wa nyuma uteganyijwe ku Cyumweru tariki ya 07 Gashyantare, uretse Amavubi, nta kipe Maroc itinjije igitego mu irushanwa rya CHAN 2020, binayishyira mu mwanya mwiza wo kwisubiza iri rushanwa kurusha uwo bazahangana.
Mu mikino itanu Maroc imaze gukina muri CHAN 2020, yinjije ibitego 13, yinjizwa 3 gusa, binayishyira ku mwanya wa mbere mu makipe yinjije ibitego byinshi mu irushanwa ry'uyu mwaka.
Umukino wo mu itsinda Maroc yakinnye n'Amavubi y'u Rwanda, niwo wonyine itigeze itsinda igitego na kimwe mu minota 90, kuko umukino warangiye amakipe yombi aguye miswi 0-0.
Maroc yasoje imikino y'amatsinda itsinze ibitego 6, itsinzwe 2. Ni nyuma yo gutsinda Togo ku mukino wa mbere 1-0, inganya n'Amavubi 0-0, inyagira Uganda 5-2.
Mu mikino ya 1/4, Maroc yatsinze Zambia 3-1 inayisezerera muri iri rushanwa.
Iyi kipe yo mu Barabu yashimangiye ko ishaka kwisubiza igikombe cy'iri rushanwa ku mukino wa 1/2, nyuma yo kunyagira Cameroun yari imbere y'abafana ibitego 4-0.
Benshi mu bakurikiranira hafi umupira w'amaguru bemeza ko hatabayeho gutungurana nta kabuza Maroc izisubiza igikombe cy'uyu mwaka, kuko bahamya ko nta gikomeye cyane Mali izakora imbere y'iyi kipe.
Maroc niyo yegukanye irushanwa riheruka gukinirwa iwabo mu 2018, niyegukana irushanwa ry'uyu mwaka izaba iteye ikirenge mu cya Repubulika iharanira Demokarasi ya Congo imaze guca agahigo ko kwegukana ibikombe bibiri muri iri rushanwa.
Umukino wa nyuma uzakinwa ku Cyumweru tariki ya 7 Gashyantare, aho uzabanzirizwa n’uw’umwanya wa gatatu uzahuza Guinea na Cameroun.
Maroc yanganyije n'Amavubi 0-0
Sugira Ernest agerageza gutera mu izamu rya Maroc
Maroc yanyagiye Cameroun 4-0 muri 1/2 igera ku mukino wa nyuma
Eng
RSS 
TANGA IGITECYEREZO