Abamaze guhitanwa na Coronavirus bageze ku 146 naho abayanduye ni 11,259

Itangazo rya Minisante ryerekana ko abo yishe ari abagabo bane barimo uw’imyaka 79 w’i Huye n’abafite imyaka 78, 61 na 33 bo mu Mujyi wa Kigali.

Kuri uyu wa Mbere habonetse abarwayi 227 basanganywe Coronavirus mu bipimo 2950 mu gihe abarwayi 49 bayikize mu masaha 24 yashize.

Abarwayi bashya bakuwe muri Kigali: 139, Kirehe: 20, Huye: 11, Gatsibo: 9, Gicumbi: 8, Rulindo: 7, Musanze: 7, Gisagara: 5, Nyanza: 5, Rubavu: 4, Ruhango: 3, Nyamasheke: 3, Nyamagabe: 2, Muhanga: 1, Kamonyi: 1, Karongi: 1, Kayonza: 1.

Mu Rwanda hamaze gufatwa ibipimo bya Coronavirus 799 817, hasanzwemo abantu 11 259 banduye. Muri bo 7412 basezerewe nyuma yo gupimwa bagasangwa nta bwandu bagifite mu gihe 3701 bakiri kwitabwaho.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa gukomeza kwitwararika no kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwirinda guhura bitari ngombwa no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi. 

Mu minsi ishize Leta yatangaje ko ubwisungane mu kwivuza bugiye kujya bwifashishwa mu kwivuza coronavirus. Kuri ubu biteganyijwe ko ku ya 20 Mutarama 2021 I Kigali hazasesekara umuti wo kugoboka indembe za Covid-19, ni mu gihe u Rwanda ruri mu bihugu bibiri byiteguye kwakira urukingo.