Kigali

Premier League: Abatoza basabye ko shampiyona ihagarara nyuma yuko umubare w'abakinnyi banduye COVID-19 wiyongereye

Yanditswe na: SAFARI Garcon
Taliki:30/12/2020 13:01
0

Abatoza batandukanye barimo Sam Allardyce wa West Bromwich Albion na Nuno Espirito Santo wa Wolves, basabye abategura shampiyona y'icyiciro cya mbere mu Bwongereza, Premier League, ko yaba ihagaze gato nyuma y'uko hongeye kugaragara umubare munini w'abakinnyi banduye Coronavirus.



Kuri uyu wa Kabiri tariki 29 Ukuboza 2020, ibipimo byafashwe byagaragaje ko 18 barimo abakinnyi n'abagize Staff z'amakipe banduye COVID-19, uyu ukaba ariwo mubare munini w'abakinnyi benshi banduye iki cyorezo kuva uyu mwaka w'imikino watangira.

Kuba umubare munini w'abanduye iki cyorezo wagaragaye mu ikipe ya Fulham, hakomeje kwibazwa niba umukino wagombaga kuyihuza na Tottenham ukinwa cyangwa nawo usubikwa.

Allardyce yagize ati "Mfite impungenge njyewe ubwanjye ndetse no ku mupira w'amaguru muri rusange".

Ku wa mbere, umukino wagombaga guhuza Manchester City na Everton wasubitswe habura amasaha ane ngo utangire, kubera icyorezo cya Coronavirus.

Uyu mutoza yavuze ko akaruhuko gato aricyo kintu gikenewe kugira ngo bahangane n'iki cyorezo.

Nyuma yuko ikipe ye itsindiwe mu rugo na Leeds United ibitego 5-0 mu ijoro ryo kuri uyu wa kabiri, Allardyce yagize ati"Umutekano kuri bose nicyo kintu nyamukuru mbere y'ibindi byose".

"Numvise ko iki cyorezo gishya cyandura ku buryo bwihuse kuruta icya mbere, ikintu gikenewe ubu ni ukubanza guhagarika gato".

"Mfite imyaka 66, sinifuza kwandura COVID-19, naho twagerageza gute, naho twakwipimisha gute, naho twakwambara udupfukamunwa gute, turakomeza kwandura mu gihugu cyose".

Umunya-Portugal Nuno Espirito Santo utoza ikipe ya Wolves, nawe yunzemo ko ababishinzwe bagira icyo bakora mu maguru mashya kuko biteye inkeke nyuma yuko ikipe ye itsinzwe na Manchester United mu ijoro ryo ku wa kabiri.

Yagize ati"Umubare w'abandura uragenda wiyongera ku buryo buteye ubwoba, ku buryo natwe ntaho tuyihungira".

"Hariho ibintu udashobora gukwepa, iyo ari indwara y'inzaduka ije, abantu bakwiye kwicara bakareba icy'ingenzi kuruta ibindi".

Kugeza magingo aya ntacyo ubuyobozi bwa Premier League buratangaza kuri iki kibazo, ndetse nta nicyo Leta y'u Bwongereza iravuga ku ngamba zikwiye gufatirwa ubu bwandu bushya.

Sam Allardyce wa West Brom yabaye uwa mbere mu gusaba ko Shampiyona iba ihagaze gato kubera COVID-19

Nuno Espirito Santo wa Wolves asanga shampiyona ikwiye guhagarara






TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND