Kigali

Moukoko wa Dortmund yaciye agahigo muri Bundesliga y'u Budage ku myaka 16

Yanditswe na: SAFARI Garcon
Taliki:19/12/2020 14:38
0

Umudage w'umunya-Cameroun ukinira ikipe ya Borussia Dortmund, Youssoufa Moukoko, yanditse amateka akomeye yo kuba umukinnyi wa mbere utsinze igitego muri shampiyona y'u Budage akiri muto cyane.



Ku mugoroba wo kuri uyu wa gatanu tariki ya 18 Ukuboza 2020, Dortmund yari ku kibuga cya Union Berlin, umukino urangira ihatsindiwe 2-1, gusa ariko uyu mukino wasize amateka mashya muri iyi shampiyona iri muzikunzwe cyane ku Isi.

Igitego kimwe rukumbi cya Dortmund cyatsinzwe na Youssoufa Moukoko ku munota wa 60 w'umukino cyabaye igitego cy'amateka, kuko yabaye umukinnyi wa mbere utsinze igitego akiri muto mu mateka y'iyi shampiyona.

Ku myaka 16 n'iminsi 28, Moukoko yinjiye mu bitabo bya Bundesliga nk'umukinnyi utsinze igitego akiri muto mu mateka yayo.

Tariki ya 21 Ugushyingo 2020, Moukoko yari yaciye agahigo ko kuba umukinnyi wa mbere ukiri muto ukinnye umukino wa shampiyona, ubwo yari afite imyaka 16 y'amavuko, yongera guca agahigo ko kuba umukinnyi ukiri muto ukinnye UEFA Champions League, ku myaka 16 n'iminsi 18, ndetse yongera guca agahigo ko kuba umukinnyi wa mbere muto ubanje mu kibuga ku mukino wa shampiyona y'u Budage ku myaka 16 n'iminsi 25.

Muri uyu mukino, Union Berlin niyo yafunguye amazamu ku gitego cyatsinzwe na Taiwo Awoniyi ku munota wa 57, Youssoufa Moukoko wa Dortmund acyishyura nyuma y'iminota itatu gusa ku munota wa 60, gusa ku munota wa 78, Marvin Friedrich atsindira Union Berlin igitego cy'intsinzi cyayihesheje amanota atatu.

Gutsinda uyu mukino byatumye Union Berlin izamuka ku rutonde rwa shampiyona, aho yagize amanota 21 ijya ku mwanya wa gatanu, isatira Dortmund ya kane, aho iyirusha inota rimwe gusa.

Moukoko yabaye umukinnyi wa mbere ukiri muto utsinze muri Bundesliga

Moukoko yanditse amateka akomeye mur Bundesliga





TANGA IGITECYEREZO

Izina ryawe
Email yawe
Andika igitecyerezo


Inyarwanda BACKGROUND