Ibipimo bya kabiri byerekanye ko rutahizamu wa Liverpool n'ikipe y'igihugu ya Misiri, Mohamed Salah, agifite ubwandu bwa coronavirus, bituma atazagaragara mu mukino ukomeye utegerejwe ku Cyumweru, Liverpool izakina na Leicester City iri ku mwanya wa mbere muri Premier League ndetse n'uwa Atalanta muri Champions League.
Mu cyumweru gishize, ni bwo Salah w'imyaka 28 y'amavuko yasanzwemo Coronavirus ku nshuro ya mbere ubwo yari mu mwiherero w'ikipe y'igihugu ya Misiri, nubwo nta bimenyetso byayo yagaragaje.
Kuri uyu wa gatatu tariki 18 Ugushyingo 2020, Ishyirahamwe ry'umupira w'amaguru mu Misiri ryemeje ko nanone Salah bamusanzemo Covid-19 ubwo bongeraga kumupima.
Birashoboka ko uyu mukinnyio atazakina imikino ibiri ya Liverpool igiye gukurikiraho, harimo uwa Leicester City muri premier League ku cyumweru tariki ya 22 Ugushyingo 2020, ndetse n'uwa Atalanta muri Champions League ku wa gatatu w'icyumweru gitaha tariki ya 25 Ugushyingo 2020, kubera amategeko yo kwishyira mu kato.
Anyuze ku mbuga nkoranyambaga, Ku wa kabiri w'iki cyumweru, Salah yagize ati: "Nifuzaga gushimira buri muntu wese ku butumwa bwo kunkomeza no kunyifuriza gukira. Nizeye ko nzagaruka mu kibuga vuba".
Liverpool ntacyo yatangaje niba Salah azakina umukino wo ku cyumweru.
Uyu mukinnyi aracyari iwabo mu Misiri, ndetse Liverpool izakurikiza amabwiriza ya leta y'icyo gihugu n'aya Premier League ajyanye n'igihe ashobora kongera kwemererwa kugaruka mu kibuga.
Muri uyu mwaka w'imikino, Salah yabanje mu kibuga mu mikino umunani yose ya Premier League Liverpool yakinnye, yayitsindiye ibitego umunani.
Eng
RSS 
TANGA IGITECYEREZO