Karoline Leavitt, umuvugizi wa White House, yakoze ikiganiro cya mbere n'abanyamakuru ku wa Kabiri tariki ya 28 Mutarama 2025, aba umuntu muto cyane uhawe uwo mwanya mu mateka ya Leta Zunze Ubumwe za Amerika aho ubu afite imyaka 27 y'amavuko.
Mu kiganiro cye cya mbere, Leavitt yatangaje ko White House igiye gufungurira imiryango ibitangazamakuru bishya, birimo abakorera kuri interineti nka podikaste n'abakoresha imbuga nkoranyambaga, mu rwego rwo gukwirakwiza ubutumwa bwa Perezida Trump ku buryo bwagutse.
Leavitt yavukiye muri New Hampshire ku wa 24 Kanama 1997, yiga itumanaho na politiki muri Saint Anselm College, aho yarangije mu 2019. Yakoze nk'umwanditsi w'imbwirwaruhame muri White House kuri manda yambere ya Trump, nyuma aba umuvugizi wungirije. Nyuma yaho, yabaye umuyobozi w'itumanaho wa Rep. Elise Stefanik nk4uko tubikesha BBC.
Karoline Leavitt Muri 2022 yiyamamarije kuba intumwa ya rubanda ahagarariye agace ka mbere ka New Hampshire mu Nteko Ishinga Amategeko ya Leta Zunze Ubumwe za Amerika. Yatsinze mu matora y’imbere mu ishyaka ry'Abarepubulikani ariko atsindwa mu matora rusange na Chris Pappas wo mu ishyaka ry'Abademokarate.
Mu kiganiro n'abanyamakuru cyamaze iminota 46, Leavitt yasubije ibibazo ku ngingo zirimo guhagarika inkunga za leta no kwirukana abimukira binjiye mu gihugu mu buryo bunyuranyije n'amategeko. Yavuze ko White House izakomeza gutanga amakuru ajyanye n'izi ngingo.
Leavitt yavuze ko azakora ibishoboka byose kugira ngo ashyire imbere itumanaho rihamye hagati ya White House n'itangazamakuru, anashimangira ko azakomeza gukorana bya hafi na Perezida Trump mu kugeza ubutumwa ku baturage.
Aciye agahigo ko kuba umuvugizi wa White House ku myaka 27 y'amavuko
Eng
RSS 
TANGA IGITECYEREZO