Dukunze kumva ibibazo by’ihohoterwa rikorerwa mu ngo cyane cyane irishingiye ku gitsina. Usanga ibirego byinshi polisi yakira biba ari iby’abashakanye bicanye, cyangwa ababyeyi bahohoteye abana babo. Ibyabereye muri Nigeria ho umugabo yaciye ikiganza cy’umugore we ngo kubera ko yakekaga gusa ko amuca inyuma.
Inkuru dukesha ikinyamakuru Nairaland ivuga ko tariki ya 26 Mutarama 2025, Ubuyobozi bwa Polisi yo muri Enugu, Nigeria yataye muri yombi Echege w’imyaka 33, azira guca ikiganza cy'ibumoso cy'umugore we,Chinonso Echege.
Uyu mugabo yafashwe binyuze mu bufatanye bw’abaturage na polisi, kandi umuhoro yakoresheje mu gukora icyaha wabonywe mu rugo rwe, uri kwifashishwa mu iperereza.
Iperereza ry'ibanze ryerekana ko ukekwa yemeye icyaha, yavuze ko yabikoze kuko yakekega ko umugore we amuca inyuma, ari byo byamuteye umujinya kuko abifata nk’agasuzuguro gakomeye.
Yanavuze ko ikintu atabasha kwihanganira ari umugore umuca inyuma kandi ko ibi byose yabikoreshejwe n’agahinda. Nyamara avuga ko atigeze amufata, ahubwo ko ari ugukeka gusa.
Umuvugizi wa Polisi, SP Daniel Ndukwe, yemeza ko Echege yatawe muri yombi, avuga ko iperereza rigikomeje kandi ko azashikirizwa urukiko kugira ngo akurikiranwa n’amategeko.
Ndukwe yongeyeho ko Komiseri wa Polisi y'igihugu, CP Kanayo Uzuegbu, yategetse ko hakorwa iperereza ryimbitse kandi ku gihe, yakomeje asaba abashakanye gukemura amakimbirane yabo binyuze mu rukundo, ubwumvikane, ndetse n’uburyo bwemewe n’amategeko aho kwitabaza ibikorwa by’ubugizi bwa nabi no kwihanira.
Eng
RSS 
TANGA IGITECYEREZO