Ese ibyabaye mu 2024 birisubiramo? Ibyo kwitega mu Gikombe cy’Intwari

Ku isaha ya Saa Cyenda kuri Kigali Pele Stadium kuri uyu wa Kabiri tariki 28 Mutarama 2025, APR FC irakina umukino wa mbere wa Kimwe cya kabiri mu Gikombe cy’Intwari, naho Saa Kumi n’Ebyiri ikipe ya Rayon Sports icakirane na Police FC.

Ni irushanwa riheruka kwegukanwa na Police FC kuko mu 2024 yatsinze APR FC ibitego 2-1. Ibitego bya Police FC byatsinzwe na Peter Agblevor mu gihe kimwe cya APR FC cyatsinzwe na Nshimirimana Yunusu.

Muri kimwe cya Kabiri ikipe ya APR FC yageze ku mukino wa nyuma yabanje gusezerera Musanze Fc kuri penaliti. Umukino usanzwe amakipe yombi yari yanganyije ari igitego kimwe kuri kimwe. Icya APR FC cyatsinzwe na Ndikumana Danny maze Musanze cyo gitsindwa na Salomon Adeinka.

Nk’uko amategeko y’iri rushanwa yabivugaga muri 2024 mu ngino ya Kane, iyo umukino urangiye amakipe anganya ibitego bahita bitabaza Penaliti. Aha niho APR FC yahise ikomeza ku mukino wa nyuma itsinze kuri Penaliti Musanze FC 5-3 bityo ikipe yo mu Majyaruguru y’u Rwanda ihita isezererwa.

Ku rundi Ruhande ikipe ya Police Fc yegukanye iki gikombe yo yari yasezereye Rayon Sports muri kimwe cya Kabiri. Ni umukino amakipe yombi yari yabanje kunganya igitego kimwe kuri kimwe. Igitego cya Rayon cyatsinzwe na Heritier Nzinga Luvumbu, naho kuri Police itsindirwa na Peter Agbrevol.

Nyuma yo kunganya kw’Amakipe yombi hahise hitabazwa penaliti, Police igera ku mukino wa nyuma isezereye Rayon Sports kuri penaliti 4-3.

Nk'uko byari umuriro mu 2024, ni nako biza kuba uyu mwaka wa 2025 kuko uretse ikipe ya Musanze Fc yasimbuwe na AS Kigali, andi makipe yose yakinnye igikombe cy’intwari umwaka ushyize azagaragara mu cy'uyu mwaka.

AS Kigali, Police FC, APR FC na Rayon Sports nizo zitangira kwesurana kuri uyu wa Kabiri zishakamo ikipe imwe izegukana igikombe cy’Intwari.

Ni imikino yitezweho byinshi byumwihariko kwigaragaza ku ikipe ya Rayon Sports na APR FC cyane ko zombi nizibasha kwikura muri kimwe cya Kabiri zizacakiranira ku mukino wa Nyuma uteganyije ku wa Gatandatu ku itariki 1 Gashyantare ku munsi w’Intwari.

Imikino iheruka guhuza amakipe azahura muri Kimwe cya Kabiri, muri shampiyona APR FC yabashije gutsinda AS Kigali igitego 1-0, naho Rayon Sports nayo itsinda Police Fc ibitego 2-0. Imibare igaragaza ko muri shampiyona ya 2024-25 Ikipe ya APR na Rayon Sports zitwaye neza imbere ya AS Kigali na Police Fc zizahura muri kimwe cya Kabiri cya Heroes Cup.

Nubwo APR FC iherutse gutsinda AS Kigali 1-0 muri shampiyona ntabwo twakwirengagiza ko yari imaze imyaka itanu itayitsinda, ikintu cyo gushyiraho icyitonderwa cyane ko AS Kigali ikunze kugora APR FC mu mikino yo gukuranwamo.

Ikipe ya AS Kigali irakina na APR FC yaramaze kongeramo intwaro ya karahabutaka Haruna Niyonzima uherutse kuyisinyira nyuma yo gutandukanana Rayon Sports.

Ikipe ya APR FC nayo iraza gukina Igikombe cyu’Intwari ifite abakinnyi bashya batatu aribo Hakim Kiwanuka, Denis Omedi na Djibrir Cheik Ouattra.

Ku rundi ruhande Rayon Sports yo izaba ikina na Police FC nta mukinnyi mushya irongera mu ikipe yabo muri uku kwezi kwa Mutarama, ariko Police Fc yo bizaba bihanganye yamaze kongeramo Byiringiro Lague yapapuye Rayon Sports yari yagiye kumwakira ku kibuga cy’indege.

Abakinnyi bo kwitega mu gikombe cy’Intwari harimo abakinira Rayon Sports nka Adama Bagayogo, Fall Ngagne, Muhire Kevin na Aziz Bassane.

Ku ruhande rwa APR FC harimo Mahamadou Lamine Bah, Mamadou SY, Djibril Ouattra, Hakim Kiwanuka na Denis Omedi.

Naho ku ruhade rwa Police FC abakinnyi bo kwitega harimo Hakizimana Muhadjir, Ani Elijah na Peter Agblevor. Ku ruhande rwa AS Kigali harimo Haruna Niyonzima, Emmanuel Okwi, Iyabivuze Osse ndetse n’abandi.

Polive FC ifite igikombe giheruka irongera gutangirira kuri Rayon Sports mu Gikombe cy'Intwari