Ikipe ya AS Kigali ikina shampiyona y'icyikiro cya mbere mu Rwanda, yemeje ko yasinyishije umukinnyi w'Umunyarwanda, Haruna Niyonzima ku nshuro ya gatatu.
Iyi kipe niyo yabitangaje mu ijoro ryo kuri uyu wa Gatandatu ibinyujije ku mbuga nkoranyambaga zayo. Uyu mukinnyi yasinye amasezerano y'amezi atandatu ashobora kongerwa bijyanye n'uko azaba yitwaye.
Haruna Niyonzima yaherukaga gutangira gukora imyitozo muri iyi kipe y'Abanyamujyi gusa iyi kipe yari itaramutangaza nk'umukinnyi wayo.
Ubwo uyu mukinnyi yaganiraga na InyaRwanda yavuze ko intego ari ugufasha iyi kipe kwegukana ibikombe birimo icy'Intwali ndetse n'icy'Amahoro.
Ni ku nshuro ya gatatu uyu mukinnyi asubiye muri AS Kigali nyuma y'uko yayigiyemo muri 2019 akaza kongera kuyijyamo muri 2021.
Agiye muri AS Kigali nyuma y'uko mu mpeshyi y'umwaka ushize yari yasinyiye Rayon Sports gusa akaza gusesa amasezerano yari yagiranye nayo nyuma y’iminsi 52 aho yavugaga ko iyi kipe itubahirije amasezerano bari bagiranye.
AS Kigali izaba ifite Haruna Niyonzima mu mikino yo kwishyura ya shampiyona, yasoje imikino ibanza iri ku mwanya wa 3 n'amanota 26 gusa kuwa Kabiri w'icyumweru gitaha ifitanye umukino na APR FC mu gikombe cy'Intwali.
AS Kigali yahaye ikaze Haruna Niyonzima
Eng
RSS 
TANGA IGITECYEREZO