Umubyeyi w’imyaka 33 witwa Chazzity Candelario, utuye muri Leta ya Pennsylvania muri Leta Zunze Ubumwe za Amerika, yatawe muri yombi azira gufungira umwana we w’imyaka 11 ku buriri akoresheje amapingu, mu gihe yari agiye ku kazi nk’uko byatangajwe n’inzego z’umutekano.
Nk’uko raporo y’abashinzwe umutekano ibigaragaza, abapolisi basanze umwana uwo mubyeyi yafatiriye mu nzu ye yo mu gace ka Lebanon County. Uyu mwana yatangaje ko nyina yajyaga amuzirikira ku itanka y’amavuta yo gutekesha cyangwa akamushyira mu cyumba gito cy’ibikoresho igihe cy’amasaha abiri.
Candelario yemeye ibyaha ashinjwa, avuga ko yabiterwaga no kutabona uburyo bwo kugenzura imyitwarire y’umwana we igihe aba atari mu rugo. Uyu mwana yavuze ko ku itariki ya 11 Mutarama, nyina yamufungishije amapingu nyuma yo kumuhana ngo kubera kurya ibiryo byinshi birenze ibyo yari yemerewe. Yanongeyeho ko nyina yajyaga amufungira ku itanka cyangwa mu gisenge.
Umushinjacyaha wa Lebanon County, Pier Hess Graf, yagize ati: "Hari itandukaniro rikomeye hagati yo guhana umwana no kumuhohotera. Ibi ni ihohoterwa rikabije kandi ridakwiye kwihanganirwa."
Nyuma yo gutabwa muri yombi, Candelario yarekuwe by’agateganyo ku itariki ya 16 Mutarama amaze gutanga ingwate ya $100,000. Biteganyijwe ko azitaba urukiko ku itariki ya 23 Mutarama nk’uko tubikesha ikinyamakuru Daily Mail.
Iyi nkuru yakanguye benshi, bamwe bibaza uburyo umubyeyi yakoresha urugomo nk’urwo ku mwana we aho kumurinda no kumwitaho nk’uko bisanzwe bitegerejwe ku babyeyi.
Eng
RSS 
TANGA IGITECYEREZO