Rutahizamu ukomoka muri Norway, Erling Haaland yongereye amasezerano y'imyaka 9.5 ari umukinnyi w'ikipe ya Manchester City azarangira mu mpeshyi y'umwaka wa 2034.
Uyu mukinnyi amasezerano yari afite muri iyi kipe yari kuzarangira mu mpeshyi ya 2027 ariko nk'uko ikinyamakuru The Athletic cyabitangaje, yamaze gushyira umukono ku masezerano mashya azatuma akinira Manchester City imyaka 10 y'imikino iri imbere.
Bivuze ko aya masezerano azarangira Erling Haaland afite myaka 34 dore ko kuri ubu afite imyaka 24. Ibi bibaye mu gihe mu minsi yashize byari byaragiye bivugwa hari amakipe amwifuza arimo Real Madrid na FC Barcelona.
Erling Haaland yasanzwe ahembwa amafaranga agera ku bihumbi 375 by'Amayero ku Cyumweru gusa muri aya masezerano mashya byitezwe ko azongerwa akazaba ariwe mukinnyi uhembwa amafaranga menshi muri Manchester City, mu mateka ya Premier League ndetse azaba ari no mu bahembwa menshi ku Isi.
Uyu mukinnyi yerekeje mu ikipe ya Manchester City muri 2022 avuye muri Borussia Dortmund aho yari aguzwe agera kuri miliyoni 60 z'Amapawundi.
Kuva yayigeramo amaze kuyikinira imikino 126 akaba yaratsinzemo ibitego 111 ndetse akaba yaranayifashije gutwara ibikombe bibiri bya Premier League,1 cya FA Cup,icya UEFA Champions League ndetse n'icya Super Cup.
Manchester City yongereye amasezerano Erling Haaland mu gihe iri mu nzira zo gusinyisha abandi bakinnyi nka Abdukodir Khusanov na Omar Marmoush.
Erling Haaland yongereye amasezerano y'imyaka 9.5 muri Manchester City
Eng
RSS 
TANGA IGITECYEREZO