Mbanza gusura Urwibutso rwa Jenoside rwa Gisozi- Miss Sonia Rolland uri i Kigali

Sonia uherutse kwambikwa impeta y’urukundo n’uwahoze ari umukunzi we mu myaka 20 ishize, Christophe Rocancourt amaze iminsi mu Rwanda mu rugendo rugamije gusura ibice nyaburanga bitandukanye by’u Rwanda, ndetse yagaragaje hamwe mu hantu hazwi hakunda gusurwa na ba mukerarugendo yageze. 

Mu butumwa bwe bwo ku rubuga rwa Instagram yatambukije kuri uyu wa Kabiri tariki 14 Mutarama 2025, Miss Sonia Rolland yavuze ko buri gihe iyo ageze mu Rwanda abanza gufata umwanya wo gusura Urwibutso rwa Jenoside rwa Kigali mu rwego rwo kurushaho kumenya no kwihuza n’amateka no kwibuka.

Yavuze ko “Mbere yo kuzenguruka u Rwanda, buri gihe mpagarara ku Rwibutso rwa Jenoside rwa Kigali ruherereye ku Gisozi.”

Akomeza avuga ko “Inshingano yo Kwibuka irakenewe cyane kugirango tumenye amateka yacu, inzira yanyuzwe hamwe n’icyizere cyabantu bunze ubumwe mu myaka 30 ishize kugirango batere imbere.”

Miss Sonia yanagaragaje ko buri gihe iyo ari mu Rwanda ahura kandi akaganira na Mubyara we Françoise, kandi bakunze kubonana kuva akiri umwana.

Mu bihe bitandukanye Miss Sonia yagiye agenderera u Rwanda, agamije gusura inshuti n’abavandimwe no gukora ku mishinga ye inyuranye cyane cyane iya Cinema. Mu 2023 yahafatiye amashusho ya filime nshya ‘Entre deux’ yanditswe na Jonas d’Adesky.

Uwitonze Sonia Rolland yabonye izuba ku wa 11 Gashyantare 1981 avukira i Kigali. Ni umunyarwandakazi, uvuka kuri Se witwa Jacques Rolland ufite inkomoko mu Bufaransa, na Nyina w’umunyarwandakazi.

Ku ya 14 Ukuboza 2002, yari umwe mu bagize inteko y’abacamanza mu matora ya Nyampinga w'u Bufaransa 2003. Mu 2003, yagaragaye mu mashusho yi’ndirimbo ‘Ensemble’ ya Corneille.

Ku ya 7 Ukuboza 2013, mu mugoroba w’amatora ya Nyampinga w’u Bufaransa 2014 yatambutse kuri televisiyo y'u bufaransa, Miss Sonia watangaje ko abatsinze kimwe cya kabiri kirangiza afatanyije na Jean-Pierre Foucault hamwe n’umuyobozi w’umuryango wa Nyampinga mu bufaransa.

Ku ya 19 Ukuboza 2020 kuri televiziyo y’u Bufaransa, ni umwe mu bagize inteko y’abagore y’abacyemurampaka yihariye mu matora ya nyampinga w’u bufaransa muri 2021.

Muri 2006, Miss Sonia yashakanye na Christophe Rocancourt, bafitanye umwana umwe w'umukobwa wavutse kuya 13 Mutarama 2007.

Mu ntangiriro za 2009, ubwo yafotoraga, Sonia Rolland yahuye n’umukinnyi Jalil Lespert, waje kumubera inshuti. Bafitanye umukobwa witwa Kahina Lespert-Rolland, wavutse ku ya 6 Ugushyingo 2010. Batandukanye mu Kwakira 2018. 

Miss Sonia Rolland yatangaje ko mbere y’uko atemberera mu bice bitandukanye by’u Rwanda abanza gusura urwibutso rwa Jenoside rwa Kigali 

Sonia Rolland yavuze ko ari ngombwa gusura urwibutso rwa Jenoside mu rwego rwo kurushaho kwihuza n’amateka u Rwanda rwanyuzemo 

Sonia Rolland yavuze ko buri gihe iyo ari mu Rwanda, ahura kandi akaramukanya na Mubyara we  Françoise