Jimmy Carter wabaye Perezida wa 39 wa Leta Zunze Ubumwe za Amerika yitabye Imana ku myaka 100

Inkuru dukesha BBC ivuga ko Jimmy Carter yari amaze hafi imyaka ibiri ari kwitabwaho n'abaganga nyuma yo gufatwa na kanseri y'uruhu. Yizihije isabukuru y’imyaka 100 uyu mwaka mu kwezi k'Ukwakira. Akaba yaramenyekanye cyane kubera ibikorwa bye byo gufasha abandi no guteza imbere amahoro.

N'ubwo Carter yabaye Perezida wa Amerika igihe gito, azwi cyane ku bw'umushinga w'Amahoro yakoze muri 1978, Camp David Accords, wagize uruhare rukomeye mu kugarura amahoro hagati ya Misiri na Israel. Ibi byamuhesheje ishema mu mahanga yose.

Nyuma yo kuva mu Biro bya Perezida, Carter yakomeje ibikorwa by'ubugiraneza. Mu 2002, yahawe igihembo cya Nobel ku bw'ibikorwa bye mu Kigo cya Carter Center, by'umwihariko ku bikorwa byo kurwanya indwara nka Guinea worm muri Afurika no gushyigikira amatora anyuze mu mucyo. Yanavuze ko ashyigikira ibikorwa bya Habitat for Humanity, aho yagize uruhare mu kubaka inzu z'abantu bakeneye ubufasha.

Abayobozi benshi ku rwego rw'isi bagaragaje agahinda batewe n'inkuru mbi y'urupfu rwa Carter. Perezida w'Amerika Joe Biden yise Carter "umuyobozi udasanzwe" kandi ashima ibikorwa bye byo kubahiriza uburenganzira bwa muntu n'uburenganzira bwa buri wese. Biden yanategetse ko habaho umuhango w'icyubahiro mu gihe cy'igikorwa cyo gusezera kuri Carter.

Abandi ba Perezida bo mu bihe bitandukanye nabo bagaragaje akababaro batewe n'utupfu rwa Carter. Bill Clinton yise Carter umunyembaraga nyinshi mu kubaka isi nziza, mu gihe Barack Obama yemeje ko Carter yari umuhamya w'ubutabera. George W. Bush yavuze ko ubuzima bwa Carter buzahora bwibukwa muri sosiyete y’Abanyamerika.

Abayobozi bo mu bindi bihugu, nka Perezida w'Ubufaransa Emmanuel Macron ndetse na Minisitiri w'Intebe w'u Bwongereza Keir Starmer nabo bashimye ibikorwa byiza byakozwe na Carter mu gushyigikira amahoro n'uburenganzira bwa muntu. Perezida w' Misiri Abdel Fattah el-Sisi yibukije uruhare rukomeye rwa Carter mu kugarura amahoro hagati ya Misiri na Israel.

Imiryango iharanira uburenganzira bwa muntu, harimo na Human Rights Watch, yashimiye Carter kuba yari intangarugero mu kubungabunga uburenganzira bwa muntu mu buzima bwe bwose.

Nubwo Carter atakiriho, umurage we w’urukundo, ubumuntu n’ubwitange mu guteza imbere amahoro ku isi bizakomeza guha abantu isomo. Jimmy Carter yashizemo umwuka ubwo yari ari mu rugo rwe i Plains, Georgia, akaba yitabye Imana kuwa 29 Ukuboza 2024 ku myaka 100.

Jimmy Carter wayoboye Amerika yitabye Imana

Umwanditsi: KUBWIMANA Solange