Batatu nibo bonyine babanjemo! Uko abakinnyi b'Abanyarwanda bakina hanze bitwaye mu Cyumweru gishize

Duhereye muri Kenya ku munsi w'ejo ku Cyumweru ikipe ya AFC Leopards ikinamo Gitego Arthur yatsindaga Bandari ibitego 2-0. 

Kuri uyu mukino uyu rutahizamu w'Amavubi yari ari ku ntebe y'abasimbura nyuma y'uko yari amaze igihe yaravunitse. Kugeza ubu AFC Leopards iri ku mwanya wa 5 ku rutonde rwa shampiyona, ikazasubira mu kibuga ikina na FC Talanta tariki ya 05 Mutarama mu mwaka utaha.

Ku wa Kane w'Icyumweru gishize muri shampiyona y'icyiciro cya mbere muri Libya, ikipe ya Al Ahly Tripoli ikinamo Manzi Thierry yanyagiraga  Asaria ibitego 5-0.

Kuri uyu mukino,uyu myugariro w'Amavubi yari yabanje mu kibuga ndetse nta nubwo yigeze asimbuzwa. Kugeza ubu Al Ahly Tripoli iri ku mwanya wa mbere ku rutonde rwa shampiyona, ikaba izasubira mu kibuga ikina na Elettihad ku wa Gatatu w'iki Cyumweru.

Muri shampiyona y'icyiciro cya mbere muri Tunisia,ku wa Gatanu ikipe ya Stade de Tunisien ikinamo Mugisha Bonheur yatsindaga Olympique Beja  na yo ikinamo Ishimwe Anicet ibitego 3-0.

Mugisha Bonheur yari yabanje mu kibuga mu ikipe ye mu gihe Ishimwe Anicet we yinjiyemo asimbuye ku munota wa 87. Kugeza ubu Stade de Tunisien iri ku mwanya wa 4, ikaba izasubira mu kibuga ikina na Sfaxien ku wa Kane mu gihe Olimpique de Beja yo iri ku mwanya wa 7, izasubira mu kibuga ku Cyumweru ikina na Metlaoui.

Ku wa Mbere w'Icyumweru gishize,muri shampiyona y'icyiciro cya mbere muri Afurika y'Epfo ikipe ya Kaizer Chiefs ikinamo Ntwari Fiacre yanganyaga na TS Galaxy yavuyemo igitego 1-1.

Kuri uyu mukino ntabwo uyu munyezamu w'Amavubi yari yabanje mu kibuga gusa yari ku ntebe y'abasimbura. Kaizer Chiefs izasubira mu kibuga ku Cyumweru ikina na Chippa United iri ku mwanya wa 9 ku rutonde rwa shampiyona kugeza ubu.

Muri shampiyona y'icyiciro cya mbere muri Azerbaijani ,ku wa Gatandatu ikipe ya FC Zira ikinamo Mutsinzi Ange yatsindaga Sebail ifite 1-0.

Ntabwo uyu myugariro w'Amavubi yari yabanje mu kibuga ariko yinjiyemo asimbuye ku munota wa 69. Kugeza ubu FC Zira iri ku mwanya wa Kane ku rutonde rwa shampiyona, ikaba izasubira mu kibuga ikina na Araz tariki ya 17 z'ukwezi kwa Mbere.

Muri shampiyona y'icyiciro cya mbere muri Cyprus,ku munsi w'ejo ku Cyumweru ikipe ya AEL Limassol yanganyaga na Omonia Aradippou ibitego 2-2.

Ntabwo uyu myugariro w'Amavubi yari yabanje mu kibuga ndetse nta nubwo yari ku ntebe y'abasimbura. Kugeza ubu ikipe ya AEL Limassol iri ku mwanya wa 8 ku rutonde rwa shampiyona, ikaba izasubira mu kibuga ikina na Apollon tariki ya 2 z'ukwezi gutaha kwa Mbere.

Muri shampiyona y'icyiciro cya Kabiri mu Bubiligi,ku wa Gatandatu ikipe ya Raal La Louviere ikinamo Samuel Gueulette yanganyaga na RWD Molenbeek 0-0. 

Muri uyu mukino uyu mukinnyi w'Umunyarwanda yari yabanje mu kibuga ndetse nta nubwo yigeze asimbuzwa. Kugeza ubu Raal La Louviere iri ku mwanya wa kabiri ku rutonde rwa shampiyona, ikaba izasubira mu kibuga ikina na SK Beveren tariki ya 12 z'ukwezi gutaha.

Mugisha Gilbert na Ishimwe Anicet nyuma y'uko bahuriye mu kibuga