Ruben Amorim n’abakinnyi be muri Man United babuze ayo bacira n’ayo bamira

Manchester United ikomeje kugana habi nyuma yo gutsindwa 3-0 mu rugo na Bournemouth, ibi bikaba bibaye ku nshuro ya Kabiri mu myaka ibiri ikurikiranye. Mu minsi mikuru ya Noheli, iyi ntsinzwi yasize United iri ku mwanya wa 13 muri shampiyona ya Premier League, ibintu bitari byakayibayeho muri shampiyona kuva yitwa English Premier League.

Mu kiganiro n’itangazamakuru, Ruben Amorim, umutoza mushya wa Manchester United, yagaragaje ko akomeje kugerageza gushakira ibisubizo ibibazo ikipe ifite. Ati “Muri iki gihe, byose biragoye. Ku ikipe nka Manchester United gutsindwa 3-0 mu rugo birakomeye kuri buri wese. Abafana barababaye kandi barananiwe warabibonaga kuva ku munota wa mbere ku kibuga.”

Nubwo Ruben Amorim yagaragaje ko ikipe isigaye yiharira umupira mu gihe kinini (60% by’umukino), ndetse ikarushaho kugerageza gushaka ibitero, ibyo ntabwo byahinduye umusaruro wo mu kibuga.

Manchester United yongeye no gutsindwa ibitego biturutse ku mipira y’imiterekano, ikibazo kimaze kuyibera ingorabahizi muri uyu mwaka wa 2024. Bamaze kwinjizwa ibitego 17 by’ubu buryo bw’imipira y’imiterekano muri shampiyona y’uyu mwaka.

Amorim yakomeje ati: “Turacyafite imbogamizi nyinshi ku mipira y’imiterekano, ariko inshingano ni izanjye nk’umutoza. Tugomba gukomeza gukora cyane kugira ngo turusheho kunoza uburyo bwo kwirinda.”

Ku rundi ruhande, Lisandro Martinez, umwe mu bakinnyi b’inyuma ba United, yavuze ko abakinnyi bafite umujinya ku bibazo birimo  gutsindwa buri munsi no kunanirwa kugarira neza.

Ati “Twese turi mu gahinda kubera iki kibazo.Dukeneye gukosora ibijyanye no kwirinda ku mipira y’imiterekano. Iyo dutsinzwe igitego cya mbere muri ubwo buryo, umukino uba wenda kugenda ukundi.”

Mu mukino wa Bournemouth, Tyrell Malacia, wakinnye ku mwanya w’ugarira ibumoso, yasimbuwe nyuma y’igice cya mbere kubera amakosa mu guhanahana umupira. Diogo Dalot na Noussair Mazraoui bakoze amakosa akomeye, harimo no guterwa penaliti yavuyemo igitego cya kabiri cya Bournemouth.

Marcus Rashford usigaye yibera ku ntebe y’abasimbura mu mikino itatu yikurikiranya, ntiyongeye kwitabazwa, nubwo yari ku kibuga areba uko United itsindwa mu buryo buteye isoni.

Nubwo ibibazo bihari ari byinshi, Amorim avuga ko akomeza kwizera ko ikipe izazamuka. Ati “Tugomba kwemera ibyabaye no gukora cyane kugira ngo duhindure ibintu. Ntabwo twatsinzwe kubera iyi mipira y’imiterekano gusa, twatsinzwe kuko twagize amahirwe menshi ariko ntitwayabyaza umusaruro,”

Uyu mutoza kandi yagaragaje ko hari byinshi byiza ikipe igenda ikora, nubwo bitaragera ku musaruro wifuzwa, ati: “Ikipe iri kwitwara neza mu kwiharira umupira no gukora amahirwe yabyara igitego. Ibyo biratanga icyizere ko dushobora kubyaza umusaruro ibyo dukora mu mikino itaha.

Manchester United iri mu bihe bikomeye cyane, ariko Ruben Amorim n’ubwo ataramara igihe kirekire ku ntebe y’umutoza, yerekana icyerekezo cyo kugerageza gusana ikipe.

Ibibazo by’imikoranire y’abakinnyi, gucunga neza imipira y’imiterekano n’imibare idahagije y’ibitego bigomba guhinduka niba Manchester United ishaka kongera kugaruka ku rwego rwo guhatanira ibikombe.

Ruben Amorim yavuze ko ibyo muri Man United bikigoranye, ariko bizajya ku murongo

Machester United yinjiye muri Noheli ifite imibare mibi