Uwahoze ari umugore wa Chameleone yavuze uko inzoga arizo zabatandukanyije

Ku wa 12 Ukuboza 2024, Jose Chameleone yajyanywe kwa muganga shishi itabona kubera uburwayi butunguranye abantu bakomeza kwibaza byinshi ku burwayi bwe cyane ko muri uyu mwaka yakunze kurwaragurika cyane.

Nyuma yaho, Abba Marcus umuhungu wa Jose Chameleone yahishuye ko abaganga bamenyesheje umuryango w’uyu muhanzi ko ashobora kutarenza imyaka ibiri agihumeka umwuka w’abazima mu gihe yakomeza kurangwa n’imyitwarire yo kunywa inzoga.

Ibi byaje kongera kwemezwa n’uwahoze ari umugore we, Daniella avuga ko mu bintu byatumye batandukana harimo inzoga ari nazo zateraga Jose Chameleone guhohotera Daniella.

Aganira na Bukkede, Daniella yagize ati: ”Twatandukanye kuko hari igihe yajyaga asinda bikabije. Uko ni ko kuri. Hari igihe yatahaga mu gitondo, saa tatu, saa tanu cyangwa se mu gicamunsi cy’undi munsi yaborewe cyane.”

Daniella yavuze ko mbere yo gutandukana na Joe Chameleone yabanje kumwicaza amuhitishamo inzoga cyangwa se umuryango ariko Jose Chameleone ananirwa gufata umwanzuro w’icyo ashaka.

Ati “Naramwicaje mubaza ibyo ari byo. Ni iki gituma usinda kariya kageni? Nta mpamvu yari afite. Naramubwiye nti abana barimo barakura bityo ntukwiye gukomeza kwitwara gutyo imbere y’abana. Namuhaye igihe ariko mbona nta kintu kiri guhinduka.”

Kugeza magingo aya, Jose Chameleone ari kwitabwaho n’abaganga mu gihe ari kwitegura gutaramira i Kigali ku wa 03 Mutarama 2024 muri Kigali Universe.

Daniella wahoze ari umugore wa Jose Chameleone yatangaje ko mu bintu byatumye batandukana inzoga ziza mu myanya ya mbere 

Jose Chameleone ari kwitabwaho n'abaganga nyuma y'indwara y'amarabira yamufashe