Gentil Misigaro ategerejwe i Kigali mu gitaramo cya Joyous Celebration nyuma y'imyaka 5 ahataramiye

Gentil Misigaro amaze kwamamara mu muziki wo kuramya no guhimbaza Imana mu Rwanda no hanze yarwo. Izina rye rihetse inganzo yavubutsemo ubutumwa bwaruhuye imitima ya benshi binyuze mu bihangano biryoheye ugutwi.

Ni imfura mu muryango w’abana batandatu, muri bo harimo abahungu bane n’abakobwa babiri.

Uyu muramyi ufite izina mu muziki wo mu rusengero, aherutse guhishura ko kuririmba ari ibintu akora yaranabyize kuko abifitemo Impamyabumenyi ya Kaminuza yakuye muri Uganda.

Gentil Misigaro urambye mu muziki usingiza Imana, ni umuhanzi akaba n’umu Producer. Atuye muri Canada aho abana n'umuryango we. Yigisha umuziki muri Canada na cyane ko ari byo yize muri Classical & Contemporary Music. 

Yigishije umuziki mu mashuri anyuranye yaba aya Leta n'Ayigenga ndetse na n’ubu ni ko kazi akora muri Canada mu buryo bw’umwuga. Abitse mu rugo ibihembo (Awards) bitandukanye birimo na Top Canadian Immigrant of the year yahawe mu mwaka wa 2014. Ni umuhanzi ukora ibihangano mu rurimi rw'icyongereza, Ikinyarwanda n'Igiswahili. 

Misigaro yavuye imuzi impano yo gucuranga no kuririmba iri mu muryango we, ahamya ko bayikomora no kuri se wari umuhanga mu gucuranga mu rusengero.

Gentil Misigaro yavukiye mu Rwanda aba ari naho yiga amashuri abanza, icyakora ayisumbuye ayiga muri Uganda aho yize ibijyanye n’Amategeko.

Muri Kaminuza nayo yize muri Uganda, uyu muhanzi yakurikiye ibijyanye na muzika ari nabyo afitemo impamyabumenyi.

Ubwo yajyaga muri Canada mu 2012 uyu muhanzi yahise atangira kwihugura ibyo gukora no gutunganya indirimbo (Music production).

Misigaro yaje no kwiga imyaka itatu ibijyanye n’Iyobokamana, ageze kuri iyi ngingo aritsa ahamya ko ryo ataryize ngo abe pasiteri ahubwo yashakaga kwiyungura ubumenyi.

Icyakora aho atangiriye kugira izina rikomeye mu muziki, uyu mugabo yihebeye kuririmba bityo ajya kure gato yo gukora no gutunganya imiziki.

Gentil Misigaro avuga ko impano yo kuba umunyamuziki yayivomye ku mubyeyi we wamwigishije umuziki afite imyaka itandatu. Ati: “Na mama ni umuririmbyi ariko papa ni umucuranzi mwiza, ndibuka ko mu 2001 yagiye mu Budage ayoboye itsinda ry’abacuranzi beza mu itorero ryabo. Urumva rero ni we tubikuraho.”

Indirimbo ze nyinshi azitunganyiriza muri studio ye iri muri Canada. Amaze gukora indirimbo zinyuranye zahembuye imitima ya benshi zirangajwe imbere na "Biratungana,” "Hari Imbaraga", "Buri munsi" na "Hano ku isi" yafatanyije na Adrien Misigaro. Afite ku isoko Album zirimo "Buri munsi" iriho indirimbo zakunzwe mu buryo bukomeye.

Tariki 10 Werurwe 2019 ni bwo yakoreye igitaramo cy'amateka mu Rwanda, cyakurikiwe n'ubukwe bwe na Rhoda Mugiraneza.

Gentil Misigaro akunzwe cyane mu ndirimbo: 'Biratungana', 'Buri munsi' yakoranye na Adrien Misigaro, 'Umbereye maso' yakoranye na Nice Ndatabaye, n'izindi zijyana benshi mu Mwuka. Ni umuhanzi ufite izina rikomeye cyane mu muziki wa Gospel yaba mu Rwanda no muri Diaspora nyarwanda. 

Mu mpera za 2020 ni bwo yibarutse imfura y'umuhungu, ayihanurira kuzaba umukozi w'Imana udasanzwe ari nayo mpamvu yamwise Abraham. Yagize ati "Twishimiye cyane impano idasanzwe Imana iduhaye kuri uyu munsi. Iduhaye umwana w'umuhungu mwiza, ufite ubuzima bwiza. Azaba umukozi w'Imana udasanzwe, niyo mpamvu twamwise Abraham".

Gentil na Rhoda bibarutse umwana wa kabiri ku ya 16 Kanama 2021, nyuma y'amezi 11 bibarutse imfura yabo bise Abraham Misigaro wabonye izuba tariki ya 4 Nzeri 2020. Umwana wabo w'ubuheta bamwise Asaph Misigaro.

Tariki 16 Werurwe 2019 ni bwo Gentil Misigaro yasezeranye kubana akaramata n'umukunzi we Rhoda Misigaro mu muhango wabereye mu rusengero New Life Bible Church ku Kicukiro mu Mujyi wa Kigali, basezeranywa na Pastor Aaron Ruhimbya wa ERC Kimisagara. Ubukwe bwabo bwari ibirori byiyongereye ku bindi dore ko kuri iyo tariki ari nabwo Rhoda yizihiza isabukuru y'amavuko.

Ubukwe bwabo babukoze nyuma y'icyumweru kimwe Gentil Misigaro akoreye mu Rwanda igitaramo cy'amateka ari nacyo cya mbere yari ahakoreye. Muri iki gitaramo cyabaye kuwa 10 Werurwe 2019 kikabera mu ihema rya Camp Kigali ni bwo Gentil Misigaro yerekanye bwa mbere umukunzi we Rhoda baburaga iminsi micye bakarushinga.

Ni igitaramo kitazibagirana mu mateka dore ko cyahembuye imitima ya benshi, cyikitabirwa n'abantu benshi cyane barimo n'ab'ibyamamare nka King James, Apotre Masasu, Patient Bizimana, Israel Mbonyi, Uncle Austin, Alex Muyoboke, Kavutse Olivier, Miss Shanitah n'abandi. Iki ni nacyo uyu muramyi aherukamo i Kigali, ibisobanura ko agiye kongera kuhataramira nyuma y’imyaka itanu.

Ubwo yemezaga amakuru y’uko agiye kongera gutaramira mu Rwanda, Gentil yagize ati: “Yesu ashimwe Kigali! Ni Gentil Misigaro, nibyo koko ndifuza kwemeza ko nzaba ndi i Kigali tariki 29 z’ukwezi kwa 12. Ni muri BK Arena, mu gitaramo cya Joyous Celebration. Muzaze tubane, ndabakumbuye kandi nishimiye kuzabana namwe, tukaramya Imana tukayihimbaza. Muzaze muri benshi, tuzagira ibihe bidasanzwe.”

Joyous celebration ni itsinda ryo kuramya no guhimbaza Imana ribarizwa mu gihugu cya Afurika y’Epfo, ryatangiye umurimo wo kuramya no guhimbaza Imana mu mwaka wa 1994.

Joyous Celebration itegerejwe mu Rwanda mu gitaramo cyiswe "Joyous Celebration Live in Kigali". Iki gitaramo cyateguwe na Sion Communication na Zaburi Nshya Events, kizaba tariki 29 Ukuboza 2024, muri BK Arena. Alarm Ministries iri mu bazaririmba muri iki gitaramo.

Uyu muramyi kandi aritegura gutaramana na Meddy mu bitaramo agiye gukorera muri Canada. Ibitaramo bya Meddy bizatangira ku wa 14 Ukuboza 2024 mu Mujyi wa Montreal, ku wa 15 Ukuboza 2024 azataramira muro Toronto, ni mu gihe ku wa 22 Ukuboza 2024 azataramira mu Mujyi wa Ottawa. 

Gentil Misigaro wamamaye mu ndirimbo nka ‘Buri munsi’, yavuze ko mu gihe ari kwitegura gukorana indirimbo ye na Meddy, ari no kwitegura gusohora Album ‘izasohoka mu mezi macye ari imbere, abiri cyangwa atatu’.

Igitaramo Joyous Celebration bazakorera mu Rwanda kiri mu bitaramo bikomeye 6 bagiye gukora mu mpera za 2024. Ni ibitaramo bise "Joyous Celebration 28 Summer Tour" bizaherekeza umwaka uyu mwaka.

Tariki 07 Ukuboza aba baririmbyi bo muri Afrika y'Epfo bazataramira muri Kimberly; tariki 15 Ukuboza bataramire muri Johanesburg muri Rhema Bible Church; tariki 16 Ukuboza bataramire muri Mafikeng muri Mbatho Convention Center;

Tariki 20 Ukuboza aba baririmbyi bazataramira muri Malawi mu Mujyi wa Lilongwe muri Bingu International Conventional Centre; tariki 29 Ukuboza bataramire mu Rwanda mu Mujyi wa Kigali muri BK Arena, naho tariki 31 Ukuboza bataramire muri Mayine (Durban) muri ICC.

Mu ndirimbo zabo zikunzwe cyane, harimo iyitwa 'Bekani Ithemba,' 'Alikho Lelifana,' 'Awesome is your name,' ''I Am the winner,' 'Who Am I,' 'Wenzile,' 'Wakhazimula,' 'Tambira Jehova,' 'Iyo Calvari' n'izindi nyinshi zagiye zirebwa na za miliyoni kuri YouTube.

Ku bijyanye n'amatike yo kwinjira muri iki gitaramo, ahasanzwe ntabwo hahenze kuko hazishyirwa 7,000 Frw, mu gihe ahahawe izina rya Bronze hazishyurwa 15,000 Frw, muri Gold hishyurwe 25,000 Frw, Silver bishyure 30,000 Frw, Platinum hishyurwe 40,000 Frw, naho muri VVIP hishyurwe 50,000 Frw. Ubu wagura itike yawe unyuze kuri www.ticqet.rw.

Mu gihe rero imyiteguro y'iki gitaramo irimbanije, bamwe mu bayobozi b’iri tsinda baherutse gusura u Rwanda kugira ngo barebe mbere aho kizabera, mu rwego rwo kumenya neza niba koko igitaramo 'Joyous Celebration Live in Kigali Concert' kizagenda neza. 

Abo bayobozi basuye u Rwanda, ni Umuyobozi wa Joyous Celebration, Boniswa Mbambo n'Umuyobozi ushinzwe Tekinike, KGABO Thabo Petros. Aba bayobozi bahawe ikaze mu Rwanda n'itsinda ririmo Peace Nicodem wa Sion Communicatons ndetse na Ntaganzwa Plaisir wa Zaburi Nshya Events bafatanyije gutegura iki gitaramo cy'amateka.

Gentil Misigaro agiye kongera gutaramira i Kigali nyuma y'imyaka itanu

Uyu muramyi urambye mu muziki wo kuramya no guhimbaza Imana, abifitiye n'impamyabumenyi

Ni igitaramo cya Joyous Celebration azahuriramo n'abarimo Alarm Ministries