Police y'u Rwanda yavuze ku kibazo cyuko ikipe yabo ya Police Women Football Club yatewe mpaga na Bugesera Women Football Club bitewe n'uko Abapolisi bashinzwe umutekano babuze ku kibuga.
Ku Cyumweru Saa Cyenda ni bwo ikipe ya Police WFC yagombaga kwakira Bugesera WFC gusa birangira uyu mukino utabaye bitewe n'uko hahuze Abapolisi ku kibuga.
Iyi kipe yo mu Karere ka Bugesera yahise itera mpaga y'ibitego 3-0 iyi kipe y'Igipolisi bitewe n'uko amategeko y'ishyirahamwe ry'umupira w'amaguru mu Rwanda, FERWAFA, avuga ko nta kipe yemerewe gukina mu gihe Abapolisi bashinzwe umutekano badahari.
Nyuma y'ibi, umunyamakuru wa B&B Kigali, Imfurayacu Jean Luc abinyujije ku rukuta rwe rwa X yabajije Polisi impamvu batereranye ikipe yabo. Yamusubije ivuga ko iki kibazo batangiye kugikurikirana kandi ababigizemo uruhare bakaba bazahanwa uko bikwiriye.
Yanditse iti: "Muraho, ikibazo cyo kubura abashinzwe umutekano ku kibuga aho ikipe ya Police Women FC na Bugesera Women FC zagombaga guhura, twatangiye kugikurikirana kandi ababigizemo uruhare bazahanwa uko bikwiriye. Murakoze".
Kugeza ubu ikipe ya Police WFC iri ku mwanya wa 9 ku rutonde rwa shampiyona n'amanota 8 aho irushwa amanota 20 na Rayon Sports WFC iri ku mwanya wa mbere mu mikino 10 imaze gukinwa.
Eng
RSS 
TANGA IGITECYEREZO