Ahabanza Imikino

Amateka aranditswe! Amatike y'umukino wa Rayon Sports na APR FC yashize ku Isoko

Yanditswe na: Aloys Niyonyungu
Taliki:6/12/2024 13:56 0

Amatike y'umukino w'ikirarane cyo ku munsi wa Gatatu wa shampiyona y'icyiciro cya mbere mu Rwanda uzahuza Rayon Sports na APR FC yashize ku Isoko.

Ku munsi w'ejo ku wa Gatandatu Saa Kumi n'Ebyiri z'umugoroba nibwo umuriro uzaba waka muri Stade Amahoro ubwo ikipe ya Rayon Sports izaba yakiriye APR FC.

Uyu mukino, ni wo mukino ukomeye ku butaka bw'u Rwanda bitewe n'amateka y'aya makipe n'abafana bafite.

Bigendanye n'abafana bajya muri iyi Stade,amatike yose kuri uyu mukino yamaze kugurwa nk'uko byatangajwe n'ikipe ya Rayon Sports ibinyujije ku mbuga nkoranyambaga zayo.

Sitade Amahoro ivuguruye ijyamo abafana barenga ibihumbi 45 bicaye neza, ariko iyi myanya yose yamaze kugurwa mu gihe habura umunsi umwe ngo uyu mukino ube.

Kuva Stade Amahoro ivuguruye yatahwa muri Nyakanga 2024, nibwo bwa mbere yuzuye mu mikino y'amarushanwa imaze kuhakinirwa.

Ibiciro by'uyu mukino ahasanzwe ni 3000 Frw, VIP ikaba 20000 Frw,VVIP 50,000 Frw ,Executive Seats ni 200,000 Frw naho Sky Boxes ni 1,000,000 Frw.