Amateka mabi yanditswe na Ghana nyuma yo kubura itike yo kujya mu gikombe cy'Afurika cya 2025

Uyu mukino warangiye Niger itsinze ibitego 2 bya Badamassi ku munota wa 22 na Sako ku munota wa 90+2 kuri 1 cya Ghana cyatsinzwe na Afriyie ku munota wa 67.

Ikipe y'igihugu ya Ghana yagiye gukina uyu mukino yaramaze kubura itike yo kujya mu gikombe cy'Afurika, gusa gutsindwa uyu mukino byatumye ikomeza kwandika amateka mabi nyuma yuko ari ubwa mbere mu myaka 20 ibuze kujya muri iyi mikino.

Ubwo yaherukaga kubura itike yo kujya mu gikombe cy'Afurika byari muri 2004 ubwo yabibuzwaga n'Amavubi bari kumwe mu itsinda rimwe.

Umukino ikipe y'igihugu ya Ghana yatsinzwemo na Niger, wabaye umukino wa mbere itsindiwe kuri Accra Sports Stadium mu myaka 24 ishize ndetse ni n'ubwa mbere mu mateka yari itsinzwe n'iyi kipe y'igihugu ku butaka bwayo.

Andi mateka mabi yanditswe n'iyi kipe y'igihugu arimo kuba ari ubwa mbere yari inaniwe gutsindira umukino n'umwe mu rugo ndetse bikaba ari ubwa mbere inaniwe gutsinda umukino n'umwe mu gushaka itike y'igikombe cy'Afurika.

Iyi kipe y'igihugu ya Ghana kandi ni ubwa mbere isoreje ku mwanya wa nyuma mu matsinda yo gushaka itike y'iki gikombe kuva cyatangira gukinwa.

Mu itsinda F iyi kipe y'igihugu ya Ghana yari irimo ryayobowe na Angola ifite amanota 14, Sudan iba iya kabiri n'amanota 8, Niger iba iya 3 n'amanota 7 naho Ghana iba iya Kane n'amanota 3.

Ghana imaze kwitabira igikombe cy'Afurika inshuro 24 ikaba yaranashoboye kucyegukana inshuro enye.