Ronaldo arashaka kuba Perezida w'Ishyirahamwe ry'umupira w'amaguru muri Brazil agaha akazi Pep Guardiola

Nk'uko ibinyamakuru bitandukanye byo muri Brazil bibyandika birimo Sport, uyu munyabigwi mu mupira w'amaguru arateganya kwiyamamariza kuyobora CBF mu matora ateganyijwe mu mwaka utaha wa 2025.

Ibi ni byo byatumye Ronaldo Narazio wari ufite ikipe ya Cruzeiro muri Brazil ahitamo kuyigurisha umuherewe witwa Pedro Lourenço kugira ngo bitazamubuza kwiyamamaza dore ko abafite amakipe muri iki gihugu baba batabyemerewe.

Uyu mugabo azaba ahanganye na Ednaldo Rodrigues usanzwe uyoboye ishyirahamwe ry'umupira w'amaguru muri Brazil kuri ubu dore ko nawe yafashe umwanzuro ko azongera kwiyamamiriza kuba Perezida.

Amakuru avuga ko Ronaldo Nazario aramutse atowe yahita ajya kuganiriza umutoza w'Umunya-Espagne, Pep Guardiola akamwemeza kujya gutoza ikipe y'igihugu ya Brazil imaze iminsi ititwara neza, akaba yayifasha kongera gutwara ibikombe.

Uyu munyabigwi mu mupira w'amaguru aramutse abaye Perezida wa CBF ntabwo byaba bitunguranye kuko muri 2012 yigeze gutangaza ko umunsi umwe aziyamamariza kuyiyobora.

Ronaldo Nazario w'imyaka 48 yakiniye amakipe arimo FC Barcelona, Real Madrid, Inter Milan, AC Milan ndetse yakiniye n'ikipe y'igihugu ya Brazil kuva mu 1994 kugeza muri 2011 aho yayifashije kwegukana ibikombe 2 by'Isi.

Kuri ubu asigaye ari umushoramari dore ko anafite ikipe ikina shampiyona y'icyikiro cya mbere muri muri Espagne yitwa Real Valladolid.

Ronaldo Nazario arashaka kuba Perezida w'ishyirahamwe ry'umupira w'amaguru muri Brazil 

Mu gihe Ronaldo yaba Perezida w'ishyirahamwe ry'umupira w'amaguru muri Brazil, Pep Guardiola niwe wahita uba umutoza w'ikipe y'igihugu ya Brazil