Yasuye u Rwanda inshuro eshatu! Ibyo wamenya ku Mushumba Mukuru wa Angilikani ku Isi wamaze kwegura

Musenyeri Welby wari umaze imyaka 12 muri izi nshingano yeguye nyuma y’aho mu cyumweru gishize hasohotse raporo y’iperereza ryigenga igaragaza ko ntacyo yakoze ubwo mu 2013 yagezwagaho raporo igaragaza ko Musenyeri John Smyth yahohoteye abahungu 130 mu bigo bya gikirisitu yayoboraga muri Winchester.

Mu itangazo ry’ubwegure bwe, yagize ati: “Mbisabiye uburenganzira, Umwami, nafashe icyemezo cyo kwegura nka Arikiyepisikopi wa Canterbury. Mu gihe negura, mbikoze mfite agahinda natewe n’abazize ihohoterwa n’abarirokotse.”

Mu cyumweru gishize byahishuwe ko mu 2013, Musenyeri Welby yashyikirijwe raporo igaragaza uko Musenyeri John Smyth yahohoteye aba bahungu mu bigo bya gikirisitu yari abereye umuyobozi mu myaka ya 1970 na 1980.

Muri iyi raporo, igaragaza ko Musenyeri Welby yashoboraga kumenyesha inzego z’igihugu kugira ngo zikurikirane Symth atarapfa, ariko ntabyo yakoze.

Nyuma y’aho tariki ya 7 Ugushyingo 2024 Keith Makin wayoboye iri perereza ashyize hanze iyi raporo, Musenyeri Welby yagaragaje ukwicuza, asobanura ko yigeze gutekereza kwegura nyuma yo kutagira icyo akora ku birego Smyth yashinjwaga, ariko abona ko akwiye kuguma mu nshingano.

Umushumba wa Angilikani muri Newcastle, Musenyeri Helen-Ann Hartley, batatu bahagarariye iri torero mu Nteko Ishinga Amategeko n’ihuriro ry’abashumba bo muri iri torero, bari basabye Musenyeri Welby kwegura ku bw’ineza y’itorero.

Musenyeri Hartley yagize ati “Biragoye kubona amagambo yo kuvuga ku byo raporo itubwira. Ntekereza ko abantu bari kwibaza bati ‘Mu by’ukuri twakwizera ko Angilikani yaturindira umutekano?’ Kandi ntekereza ko ubu igisubizo ari ‘Oya’.”

Amakuru avuga ko mu 1984, Smyth yakuwe mu Bwongereza, yoherezwa gukorera muri Zimbabwe, nyuma akaza kwimukira muri Afurika aho yaje gukomereza ibikorwa byo guhohotera abana kugeza yitabye Imana mu 2018.

Musenyeri Welby yaherukaga kuza mu Rwanda ku nshuro ya gatatu ku ya 18 Gashyantare 2017, ubwo yari yitabiriye ubutumire bwa Cathedral ya Gahini aho yatumiwe kugira ngo ashyire ibuye ry’ifatizo ku nyubako zigiye kubakwa i Gahini by’umwihariko inzu ‘East African Revival Heritage Center’ ibumbatiye amateka y’ububyutse mu karere, inzu iri kubakwa muri Diyoseze ya Gahini ku musozi wa Gahini mu karere ka Kayonza nk’ikimenyetso cy’itangiriro n’ububyutse n’ibitangaza.

Nyuma yo gusura abanya Gahini, Musenyeri Justin Welby azifatanya n’abakristo b’abanyarwanda mu materaniro azabera muri Paruwasi ya Kibagabaga mu mujyi wa Kigali tariki 19 Gashyantare 2017 ndetse ku mugoroba w’uwo munsi yitabire igitaramo kiri kubera kuri EAR Kibagabaga cyateguwe n’urubyiruko rw'abanyeshuri bo mu itorero ry’Angilikani mu Rwanda biga muri za Kaminuza zitandukanye z’i Kigali.

Nyuma y’aho azasura ishuri rya Tewolojiya ry’itorero Angilikani ryitwa Kigali Anglican Theological aho azaganira n’abanyeshuri baryo akagira ubutumwa abaha ndetse agahura n’abarimu baryo akabasaba kudacika intege nkuko tubikesha urubuga rw’itorero Angilikani mu Rwanda. Kuwa kabiri tariki 21 Gashyantare 2017 ni bwo azasoza uruzinduko rwe asubire iwabo mu Bwongereza.

Itorero ry’Abangilikani ryageze mu Rwanda mu 1925, rifite icyicaro i Gahini. Mu 1936 hatangiye andi matorero muri Uganda, Burundi, Kenya, Repubulika Iharanira Demokarasi ya Congo na Australia.

Justin Portal Welby GCVO yabaye Umushumba Mukuru wa Angilikani ku Isi w’105, wari uyoboye Itorere ry’u Bwongereza kuva mu 2013 kugeza yeguye kuri izi nshingano mu 2024.

Justin Portal Welby yavukiye mu bitaro by’umwamikazi Charlotte & Chelsea i Hammersmith, i Londres mu Bwongereza, ku ya 6 Mutarama 1956, nyuma y’amezi icyenda nyina, Jane Gillian Portal (1929–2023), ashyingiranwe na Gavin Bramhall James Welby (1910–1977).

Musenyeri Welby yavuze ko ku myaka 19 y’amavuko, yatangiye kuvuga mu ndimi z’umwuka.

Nyuma y’imyaka 11 akora mu ruganda rwa peteroli, Welby yaherewe imyitozo muri kaminuza ya St John, Durham, akora muri paruwasi nyinshi mbere yo kuba Umuyobozi wa Liverpool mu 2007 na Musenyeri wa Durham mu 2011. Izi nshingano yazimazemo umwana urenga, nyuma aza gusimbura Rowan Williams kuba Umushumba Mukuru wa Canterbury muri Gashyantare 2013.

Welby yashakanye na Caroline Eaton, babyarana abana batandatu. Mu 1983, umukobwa wabo w'amezi arindwi, Johanna, yapfiriye mu mpanuka y'imodoka yabereye mu Bufaransa.