Guinée Equatoriale yakiriwe mu Muryango w’Abibumbye! Ibyaranze iyi tariki mu mateka y’Isi

Tariki 12 Ugushyingo ni umunsi wa 317 mu igize umwaka, hasigaye 49 ukagera ku musozo.

Bimwe mu byaranze tariki 12 Ugushyingo:

965: Nibwo intebe ntagatifu yasubijwe i Roma na Papa Yohani wa XIII.

1778: Inkongi y’umuriro muri Espagne, i Colisée ho muri Saragosse, yahitanye abantu 77.

1895}: Hashinzwe iyiswe “Automobile Club de France”.

1918: Ni bwo Autriche yahindutse Repubulika.

1931: Visi Guverineri wa Ruanda-Urundi yahiritse ubutegetsi bw’Umwami Yuhi V Musinga wafatwaga nk’ubangamiye inyungu z’Ababiligi na Kiliziya Gatolika. Musinga yahise acirwa ishyanga asimbuzwa umuhungu we Mutara III Rudahigwa.

1948: Ni bwo uwahoze ari Minisitiri w’Intebe w’u Buyapani, Hidéki Tojo n’abandi bayobozi bo mu rwego rwo hejuru baciriwe urwo gupfa baregwa ibyaha by’intambara.

1956: Tunisia, Maroc na Sudani byakiriwe mu Muryango w’Abibumbye.

1968: Guinée Equatoriale yakiriwe mu Muryango w’Abibumbye.

1970: Bwabaye ubwa mbere inkubi y’umuyaga ivanze n’umuhengeri bihitana abantu benshi, ubwo abarengaho gato miliyoni bapfaga mu Kigobe cya Bengale.

1974: Ni bwo amasezerano yo guhagarika intambara hagati ya Israel na Misiri yashyizwe mu bikorwa.

1984: Hasohotse album "Like a Virgin" ya Madonna, album yakanyujijeho bigatinda.

1984: Nibwo Umuryango w’Abibumbye wemeje Uburenganzira bwa Rubanda ku mahoro atagira kidobya.

1990 : Nibwo Akihito yabaye Umwami w’Abami w’u Buyapani. Iyimikwa rye ryitabiriwe n’abakuru b’ibihugu n’aba za guverinoma bagera ku 158. Yaciye agahigo ko kwitabirwa kwa benshi mu bakuru b’ibihugu, mu birori by’iyimikwa ryabo.

1996 : Indege Boeing-747 na Iliouchine-76 zagonganiye mu kirere cy’i New Delhi, hagwa abantu 349.

1999: Umutingito w’Isi wo ku gipimo cya 7,32 wahitanye abantu 400 muri Turukiya.

1999: Ibisasu byaturikiye ku nyubako z’Imiryango ikorana na Loni mbere gato y’uko hatangira ishyirwa mu bikorwa ry’ibihano byari byafatiwe igihugu cya Afghanistan.

2002: Leta Zunze Ubumwe za Amerika zanze ibyifuzo byose bya Irak, mu isubirwamo ry’umwanzuro 1441 wa Loni wavugaga ku kwambura Irak intwaro z’ubumara n’iza kirimbuzi. Uyu mwanzuro ni kimwe mu byo Abanyamerika bishingikirijeho batera Irak ngo bakureho Saddam Hussein.

Ibyamamare byavutse uyu munsi:

1312: Edouard III, wabaye Umwami w’u Bwongereza kuva mu 1327 kugeza mu 1377.

1528: General Qi Jiguang w’Umushinwa wayoboye intambara zikomeye z’igihe cye.

1929: Grace Kelly wagaragaje impano ikomeye mu gukina filime. Yamenyekaniye cyane muri "Le train sifflera 3 fois", "Le crime était presque parfait", "Fenêtre sur cours", "Une fille en province".

Grace Kelly wanafatwaga nk’ihogoza mu bakinnyi ba filime b’igihe cye, yabereye benshi icyitegererezo mu bagore bakinnye za filime nyuma ye. Yaje kurongorwa n’Igikomangoma Rainier cya Monaco, babyarana abana batatu barimo Albert II wahawe kuyobora Monaco muri iki gihe.

Ibyamamare byitabye Imana uyu munsi:

1836: Juan Ramón Balcarce, wabaye Umuyobozi wa Gisirikare muri Argentine, akaba n’impirimbanyi yari igamije impinduramatwara muri icyo gihugu.

1904: Auguste Bartholdi washushanyije kandi agakora ikibumbano kizwi cyane muri Leta Zunze Ubumwe za Amerika cyiswe “Statue of Liberty”.