Ahabanza Imikino

RPL: Kiyovu Sports yongeye kuririra imbere ya Gasogi United ibura uyihoza

Yanditswe na: ISHIMWE Walter
Taliki:5/11/2024 17:20 0

Ikipe ya Kiyovu Sports imaze igihe yitwara nabi muri shampiyona y'u Rwanda, yatsinzwe na Gasogi United ibitego Bine kuri bitatu, ahazaza hayo haguma kuba ikibazo kuko ikomeje gutsindwa umunsi ku wundi.

Kuri uyu wa Kabiri tariki 5 Ugushyingo 2024, ikipe ya Kiyovu Sports yari yakiriye Gasogi United mu mukino w'umunsi wa Cyenda wa Shampiyona y'u Rwanda 2024-25.

Ni umukino watangiye Gasogi United iri gukinana imbaraga zidasanzwe kuko ku munota wa 4 Nshimiyimana Marc Govin yatanze umupira mwiza imbere y'izamu rya Kiyovu, maze Nzeyurwanda Djihard awukuramo utaragera kwa Ndikumana Danny.

Ku munota wa 14 abakinnyi ba Gasogi United bazamukanye umupira nuko Ndikumana Danny awuha Malipangou Christian atsindira Gasogi United igitego cya mbere.

Nyuma y'iminota ibiri Gasogi itsinze igitego cya mbere, na Kiyovu Sports yazamukanye umupira maze Nizeyimana Djuma ayitsindira igitego cyo kwishyura.

Ku munota wa 19 Marc Govin na Migisha Joseph Rama bazamukanye umupira mu izamu rya Kiyovu, bongera gutatanya ba myugariro bayo nuko Muderi Akbar afashe umupira atsindira Gasogi United igitego cya Kabiri.

Kiyovu Sports itari yorohewe na gato, ku makosa y'umuzamu Djihard yatsinzwe igitego cya Gatatu ku munota wa 29 kuri kufura yatewe na Malipangou Christian wari watsindiye Gasogi United igitego cya mbere, ayitsindira n'icya Gatatu.

Gasogi United ikimara gutsinda igitego cya Gatatu, Kiyovu Sports yahise yatakana imbaraga zidasanzwe nuko ku munota wa 45+2 Migisha Desire ayitsindira igitego cya Kabiri, amakipe yombi ahita ajya kuruhuka.

Igice cya Kabiri kigitangira Kiyovu Sports yatangiye itera akaduruvayo ku izamu rya Gasogi United nyuma y'ishoti ryatewe na Karim Makenzi ariko nyuma y'amahirwe make y'ikipe yo ku Mumena, umupira ukanyura ku ruhande.

Ku munota wa 62 Chelf Bayo yacenze Migisha Joseph Rama imbere y'izamu rya Gasogi United, gusa ibyo yari akoze Ndizeye Eric ananirwa kubishimangira umupira awutera ku ruhande.

Imbaraga zidasanzwe za Kiyovu Sports zaje guhuhurwa na Ndikumana Danny watsindiye Gasogi United igitego cya Kane ku munota wa 77.

Gutsindwa igitego cya Kane ntabwo byatumye ikipe ya Kiyovu Sports icika intege kuko yaje kubona igitego cya Gatatu ku munota wa 86 gitsinzwe na Pacifiqwe Dufitimana.

Umukinio warangiye ikipe ya Gasogi United itsinze ibitego bine kuri bitatu bya Kiyovu Sports nuko Kiyovu iguma ku mwanya wa nyuma n'amanota atatu n'umwenda w'ibitego 14.

Ikipe ya Kiyovu Sports iheruka intsinzi ku munsi wa Mbere wa Shampiyona ubwo yatsindaga AS Kigali ibitego bibiri kuri kimwe.

Gutsinda uyu mukino ku ruhande rwa Gasogi United byatumye irara ku mwanya wa 5 n'amanota 14.

Abakinnyi ba Gasogi bunze murya Rayon Sports bahuhura Kiyovu Sports