Amajyaruguru yinjije asaga Miliyari 44Frw mu misoro mu 2023/2024

Intara y’Amajyaruguru yinjije aya mafaranga mu gihe intego yari ugukusanya miliyari 48,6Frw, ikaba yaragezweho ku gipimo cya 91.9%. ku bijyanye n’imisoro yeguriwe inzego z'ibanze, iyi ntara yinjije miliyari 6,7Frw mu gihe intego yari ugukusanya miliyari 7,3Frw. Ni ukuvuga ko intego yagezweho ku gipimo cya 91,6%.

Komiseri Mukuru w’Ikigo cy’Imisoro n’Amahoro, Ronald Niwenshuti, yashimye abasora mu Ntara y’Amajyaruguru, avuga ko gushimira abasora ari umwanya wo kwereka Abanyarwanda n’abasora umusaruro wavuye mu gukusanya imisoro, kubamurikira bimwe mu byo imisoro yagejeje ku gihugu, no kungurana ibitekerezo ku byanozwa mu mikoranire ya RRA n’izindi nzego.

Ku ya 1 Ugushyingo 2024, nibwo Ikigo Cy’Igihugu cy’Imisoro n’Amahoro, cyatangije ukwezi ko gushimira abasora b’indashyikirwa, bashimirwa umusanzu wabo mu kubaka igihugu, banasabwa kwirinda ibikorwa bya magendu n’ibindi bikorwa bimunga ubukungu bw’igihugu.

Ibi bikorwa byatangiriye mu Ntara y’Amajyaruguru kuri uyu wa 5 Ugushyingo 2024 bizakomereza mu Ntara y’Iburengerazuba, abasora neza bashimirwe ku wa 8 Ugushyingo, abo mu Burasirazuba bashimirwe ku wa 12 Ugushyingo, mu Majyepfo abasora bazashimirwa ku wa 15 Ugushyingo, na ho ku itariki 20 Ukuboza 2024 hazabaho gushimira abasora ku rwego rw’igihugu.

Minisitiri w’Imari n’Igenamigambi, Yussuf Murangwa ubwo yari mu kiganiro n’itangazamakuru kuri uyu wa 1 Ugushyingo 2024, yavuze ko gushimira abasora b’indashyikirwa bituma abacuruzi barushaho kwibwiriza gutanga imisoro ibareba.

Ati: “Ibikorwa bigamije gushimira abasora bubahiriza neza inshingano zabo no gushima ibyagezweho biturutse mu misoro. Ibi bituma abacuruzi barushaho kwibwiriza gusora cyane ko ari inshingano ku bo bireba bose. Imisoro imaze kugera ku ruhare rushimishije, 51% ku ngengo y’imari.”

Minisitiri Murangwa yahamije ishoramari ry’abikorera mu myaka itanu iri imbere rizava kuri miliyari 2,2$ rikazagera kuri miliyari 4,6$ mu 2029 bizanajyanishwa no kongera ibikorerwa mu Rwanda byoherezwa mu mahanga.

Mu mwaka w'ingengo y'imari wa 2024/2025, RRA yahawe intego yo gukusanya miliyari 3,690.1Frw zihwanye na 54% mu ngengo y’imari y’igihugu ingana na 5690 Frw. Iki kigo kivuga ko kizakomeza gukora amavugurura agamije koroshya serivisi zigenewe abasora.

Hashimiwe abasora neza mu Ntara y'Amajyaruguru

Komiseri Mukuru w'Ikigo cy'Imisoro n'Amahoro, Ronald Niwenshuti yashimiye abasora neza muri iyi Ntara
Gushimira biri gukorwa mu rwego rwo kwereka Abanyarwanda umusaruro wavuye mu gukusanya imisoro