Umuvugizi w’Umujyi wa Kigali Emma Claudine ari mu gahinda ko kubura umubyeyi

Ku Gicamunsi cyo kuri uyu wa Mbere tariki 4 Ugushyingo, ni bwo Umuvugizi w’Umujyi wa Kigali, Ntirenganya Emma Claudine yatangaje iyi nkuru y’akababaro y’uko umubyeyi we wagize uruhare runini mu iterambere agezeho uyu munsi yitabye Imana.

Mu butumwa yanyujije ku rubuga rwa X, Emma Claudine yavuze ko umubyeyi we yitabye Imana ejo hashize ku Cyumweru tariki 3 Ugushyingo 2024, atangaza ko atazigera yibagirwa urukundo ndetse n’uruhare rwe mu kumuremamo uwo ari we uyu munsi.

Ati: “Ejo, nabuze Data nkunda. Papa, urukundo rwawe, ubwenge bwawe no kuba wari uhari nibyo byashushanyije uwo ndiwe, kandi icyuho usize kirenze uko umuntu yabivuga.”

Akomoza ku rwibutso amusigiye, yagize ati: “Urukundo wagaragarije abakobwa bawe, abakazana bawe, abahungu, abakwe, abuzukuru, umuryango, n'inshuti; imyitwarire yawe, uko wahoraga ushaka gufasha umuntu wese ubikeneye, n’uburyo wangaga kuba umutwaro ku bandi bizahora byibukwa. Ruhukira mu mahoro papa; uzahora iteka mu mitima yacu no mu ntekerezo zacu.”

Ntirenganya Emma Claudine yagizwe Umuyobozi Mukuru ushinzwe Itumanaho n’Uburezi mu Mujyi wa Kigali n’inama y’Abaminisitiri yari iyobowe na Perezida Paul Kagame yateranye ku mugoroba wo ku wa Gatanu tariki 14 Kamena 2024.

Mbere y’uko yinjira muri izi nshingano, yari asanzwe ari inzobere mu by’itumanaho (Communication Analyst) mu Biro by’Umuvugizi wa Guverinoma.

Emma Claudine azwi cyane mu itangazamakuru aho yakoze kuri radiyo zirimo Salus, mu biganiro byibandaga ku muryango.

Emma Claudine umaze amezi macye agizwe Umuvugizi w'Umujyi wa Kigali yatangaje ko umubyeyi we yitabye Imana

Yavuze ko atazibagirwa uruhare umubyeyi we yagize mu kuba ageze aho ageze uyu munsi

Ni umubyeyi wakundaga umuryango we