UEFA yahembye Kylian Mbappé,ashimira abakinnyi bakinanye muri Paris Saint-Germain

Kuri uyu wa Mbere tariki ya 16 Nzeri 2024 nibwo uyu mukinnyi yahawe iki gihembo. Kylian Mbappé abinyujije ku mbugankoranyambaga ze yashyizeho ifoto agifite  n'amarangamutima avuga ko buri gihe aba asonzeye gutsinda byinshi.

Yanditse ati " Igihembo cy'uwatsinze ibitego byinshi muri Champions Ligue ya 2023/24. Buri gihe mba nsozeye gutsinda ibitego byinshi. Abakinnyi bagenzi banjye twakinanye muri Paris Saint-Germain ndetse n'abatoza barakoze . Tuzabonane ejo ! Hala Madrid".

Muri UEFA Champions Ligue ya 2023/24 Kylian Mbappé yatsinze ibitego 8 mu mikino 12 yakinnye. We n'ikipe ya Paris Saint-Germain yakiniraga bageze muri 1/2 aho basezerewe na Borussia Dortmund nyuma y'uko bari basezereye FC Barcelona muri 1/4.

Muri rusange uyu rutahizamu w'ikipe y'igihugu y'u Bufaransa amaze gukina imikino 73 ya UEFA Champions League akaba yaratsinzemo ibitego 48.

Muri Monaco yahakiniye imikino 9 atsindamo ibitego 6 naho muri Paris Saint-Germain ahakina imikino 64 atsindamo ibitego 42.

Ku munsi w'ejo ku wa Kabiri Kylian Mbappé azaba yagarutse mu kibuga muri iyi mikino ya UEFA Champions League aho azaba arikumwe n'ikipe ya Real Madrid izaba yakiriye VFB Stuttgart kuri Santiago Bernabeu.

Kylian Mbappé wahawe igihembo cy'umukinnyi watsinze ibitego byinshi muri UEFA Champions League ya 2023/24