Rasmus Hojlund yahawe nimero y'amateka muri Manchester United

Rasmus Hojlund umaze umwaka akinira Manchester United, yagaragaje ko azaba rutahizamu mwiza bityo akaba yamaze kwambikwa nimero 9, yambawe n'ibihangange bitandukanye.

Rasmus Hojlund yageze muri Manchester United avuye muri Atlanta mu Butaliyani, yaguzwe miliyoni 72£. Nubwo umwaka wa mbere muri Manchester United wose utamugendekeye neza, yasoze umwaka w'imikino atsinze ibitego 15, harimo bitanu byo muri UEFA Champions League, ndetse n'ibitego 10 byo muri English Premier League.

Rasmus Hojlund, mu mwaka w'imikino yaciye agahigo ko kuba umukinnyi muto watsinze ibitego birindwi mu mikino itandatu yikurikiranya, ibyo abikora kuri buri mukino atsinda igitego.

Rasmus Hojlund yahawe nimero 9 yari ifitwe na Anthony Martial ukomoka mu Bufaransa ariko we akaba aherutse gutandukana na Manchester United. Rasmus Hojlund akigera muri Manchester United, yambaraga nimero 11.

Nimero 11 yari isanzwe yambarwa na Rasmus Hojlund muri Manchester United, izahabwa Jossua Zirkzee, umukinnyi wa mbere wasinyiye Manchester United muri iyi mpeshyi.

Nimero 9 yahawe Rasmus Hojlund, ni nimero ifite amateka akomeye muri iyi kipe, kuko yambawe n'abarimo Zlatan Ibrahimovic, Romelu Lukaku, Dimitar Berbatov n'abandi. 

Rasmus Hojlund witezweho kubica bigacika muri Manchester United yahawe nimero 9 

Mbere y'uko ahabwa nimero 9, Rasmus Hojlund yari afite nimero 11 

Anthony Martial niwe wari ufite nimero 9  muri Manchester United