Joan Laporta yamaze impungenge abafana ba Barcelona ku bijyanye no kugura Nico Williams

Umwe mu bakinnyi bakenewe cyane na FC Barcelona ni Nico Williams w'imyaka 22 y'amavuko ukinira Athletic Bilbao. Kugeza ubu nta ntambwe n'imwe iraterwa iganisha mu kugura uyu mukinnyi w'imyaka 22 y'amavuko.

Kugenda gake kwa FC Barcelona muri gahunda yo kugura Nico Williams, biri gutuma andi makipe nka Arsenal na Chelsea nayo yifuza uyu mukinnyi atangira kumugera amajanja.

Mu minsi ibiri ishize Athletic Bilbao yatangaje ko ikipe izegukana Nico Williams izaba yishyuye arenga Miliyoni 58£.

Mu gihe abafana ba FC Barcelona bakomeje kwibaza niba koko ikipe bakunda ifite gahunda yo kugura Nico Williams, Perezida wa Barcelona Joan Laporta yabamaze impungenge agaragaza ko mu minsi ya vuba, Williams azaba ari umukinnyi wa FC Barcelona.

Icyakora nta biganiro bizwi byigeze bibaho hagati ya FC Barcelona na Athletic Bilbao cyangwa Nico Williams. Gusa FC Barcelona imaze imyaka ibiri ivugwamo ubukene bukabije, birashoboka ko kubura amafaranga ariyo mpamvu iri gutuma bagenda biguruntege mu kugura Nico Williams ngo akinane na Lamine Yamal.

Nico Williams ni umwe mu bakinnyi baheruka gufasha ikipe y'igihugu ya Esipanye kwegukana Euro ya 2024 batsinze u Bwongereza ku mukino wa nyuma. Ubuhanga budasanzwe bwe, bukaba bwafasha Barcelona itozwa na Hansi Flick, agakinana na Lamine Yamal bagatanga umusaruro ukomeye. 

FC Barcelona ikomeje kugenda biguruntege muri gahunda yo kugura Nico Williams 

Abakunzi ba FC Barcelona bategereje kubona Lamine Yamal akinana na Nico Williams