Zaba umaze imyaka 14 ahakana ko Imana ibaho yavuye ku izima

Umwe mu basore bakunzwe n'abatari bake mu myidagaduro Nyarwanda byumwihariko muri Sinema, Niyonkuru Clinton [Zaba Missed Call] yahamije ko yemeye kuva ku izima ahamya ko Imana ibaho nyuma y'imyaka 14 atabikozwa.

Ibi yabitangaje kuri uyu wa Kane tariki 18 Nyakanga 2024, abantu benshi bishimira iyi nkuru, ariko kandi haza n'abandi bagaragaje ko ibi bishobora kuba ari ibinyoma cyangwa ari ukuryoshya imyidagaduro nk'uko basanzwe babimuziho.

Mu butumwa yashyize ku rukuta rwe rwa Instagram yagize ati: "Maze imyaka 14 mpakana ko Imana ibaho, ariko ubu byahindutse. Imana ibaho muryango wanjye."

Yakomeje ashimira umuntu uri inyuma yo guhinduka kw'iyi myumvire ye, avuga ko byamugoye ndetse byafashe igihe kinini, ijoro n'amanywa kugira ngo agere kuri iki kigero agezeho uyu munsi.

Ati"Ndashimira cyane umuntu uri inyuma y'ibi. Naramugoye cyane kubyumva, byadufashe iminsi n'amajoro y'ibiganiro ariko ubu noneho birabaye. Nageze ku rwego mba mfite ibintu byose mu buzima usibye amahoro n'ibyishimo, kandi maze igihe kinini mpanganye n'ibi bintu.Ubu igihe cyo kumurika kirageze."

Uyu musore yakinnye muri filime nyinshi zirimo nka 'Depression', ndetse yabaye umunyamakuru w'igihe kinini wa Isibo Tv mu kiganiro yahuriragamo n'umukunzi we Lynda witabiriye amarushanwa ya Miss Rwanda.

Mu kiganiro yagiranye na InyaRwanda mu mezi abiri ashize, Zaba yavuze ko yabaye ahagaritse ibijyanye no gutera urwenya mu bitaramo bitandukanye, ahanini bitewe nuko hari ibyo amaze igihe ahugiyemo. Avuga ariko ko nubwo bimeze gutya, yakomeje gushyigikira barumana be bashaka gutere ikirenge mu cye.

Icyo gihe, Zaba yavuze ko afatanyije na Nkusi Lynda bagize igitekerezo cyo gutegura no gushyira mu bikorwa filime igaruka ku buzima bwabo bwite (Reality TV Show) biturutse ku byavuzwe nyuma y'uko asezeye mu irushanwa rya Miss Rwanda 2021. Ati "Niho byavuye. Kandi byatanze umusaruro". 

Bafatanyije kandi, bateguraga filime bise 'Depression'. Zaba avuga ko akimara gutandukana na Isibo Tv yanahagaritse gukomeza gukora iyi filime. 

Mu 2022, nibwo bombi byavuzwe ko batandukanye ahanini biturutse ku mpamvu nyinshi. Bamwe mu bakoresha umuyoboro wa Youtube, bavugaga ko hari ibyo Lynda yamenye kuri Zaba anananirwa kubyihanganira, bigenda uko kandi no ku ruhande rwa Zaba.

Aba bombi ariko muri Mutarama 2024, bongeye kwiyunga batangira paji nshya mu mubano wabo. Zaba yabwiye InyaRwanda ko kwiyunga na Lynda byoroshye ahanini biturutse ku kuba bari bafitanye imishinga ifitiye akamaro impande zombi. 

Yavuze ko muri uko gutandukana na Lynda yakomeje akazi atangira gukora filime yise 'Yesu' izasohoka mu gihe kiri imbere. Uyu musore avuga ko ari we wateye intambwe ya mbere, asaba Lynda ko basubirana ahanini biturutse ku kurengera 'Business' bombi bahuriyeho.

Muri iki gihe, uyu musore ari kwitegura gushyira hanze filime 'Prime Jesus' ikoze mu gitekerezo-shusho cyo kwibaza uko byagenda Yesu aramutse agarutse.

Zaba Missed Call yemeye ko Imana ibaho nyuma y'imyaka 14