Euro 2024: U Bwongereza bwakubise Serbia ikitishyurwa,Jude Bellingham yandika amateka

Ni mu mukino wo mu itsinda C wabaye kuri iki Cyumweru saa tatu z'ijoro ubera kuri Vertins Areba mu gihugu cy'u Budage.

Umukino watangiye ikipe y'igihugu y'u Bwongereza ihererekanya neza gusa kugera imbere y'izamu bikagorana. Bigeze ku munota wa 12 Bukayo Saka yahinduye umupira mwiza usanga Jude Bellingham ashyiraho umutwe uhita ugenda unyeganyeza inshundura igitego cya 1 kiba kirabonetse.

Nyuma yo gutsindwa igitego ikipe y'igihugu ya Serbia yakomeje gusatirwa cyane gusa nayo ikanyuzamo igatungurana imbere y'izamu nkaho Trent Alexander Arnold yatakaje umupira usanga Aleksandar Mitrovic arekuye ishoti rinyura hepfo y'izamu gato cyane.

Umukino wakomeje ikipe y'igihugu y'u Bwongereza ikomeza ariyo ihererekanya neza abarimo Bukayo Saka bagerageza gushaka igitego cya 2 gusa ntibibakundire.

Ku munota wa 43 Dragan Stojkovic utoza ikipe y'igihugu ya Serbia yakoze impinduka mu kibuga zitateguwe ashyiramo Filip Mladenovic nyuma yuko Filip Kostic yaragize ikibazo cy'imvune.

Igice cya mbere cyarangiye u Bwongereza bukiyiboye n"igitego 1-0. Mu gice cya kabiri ikipe y'igihugu ya Serbia yaje yongera gukora impinduka mu kibuga havamo Nemanja Gudenj hajyamo Ivan Ilic ndetse ari nako isatira abarimo Dusan 

Abasore ba Servbia barimo Dusan Vlahovic bagerageje uburyo bw'inshi imbere y'izamu gusa umunyezamu Jordan Pickford akab ibamba akuramo imipira iremereye.

Ku munota wa 75 ikipe y'igihugu y'u Bwongereza yashoboraga kuba yabonye igitego cya 2 ku mupira mwiza Jarrod Bowen yarahaye Harry Kane nawe ashyiraho umutwe gusa ukubita igiti cy'izamu.

Umukino waje kurangira ikipe y'igihugu y'u Bwongereza,ibonye intsinzi y'igitego 1-0. Jude Bellingham wanatsinze igitego yanditse amateka mashya akuraho agahigo Kari gafitwe na Cristiano Ronaldo ndetse na Owen ko kuba umukinnyi ukiri muto ukinnye amarushanwa 3 makuru. 

Ku myaka 20 n'iminsi 353 yakinnye Euro ya 2020, igikombe cy'Isi cya 2022 ndetse na Euro ya 2024.

Kugeza kuri ubu muri iri tsinda C u Bwongereza nibwo buyoboye n'amanota 3, Denmark ni iya 2 n'inota 1,Slovenia ni iya 3 n'inota 1 mu gihe Serbia ya nyuma nta nota ifite.

Imikino ya Euro 2024 izakomeza ku munsi wejo kuwa Mbere ,mu itsinda D ikipe y'igihugu y'u Bufaransa ikina na Austria Saa tatu z'ijoro. Mu itsinda E ikipe y'igihugu ya Romania izakina na Ukraine saa cyenda naho saa kumi nebyiri ikipe y'igihugu y'u Bubiligi ikine na Slovakia.

Jude Bellingham yishimira igitego na Bukayo Saka wamuhaye umupira 

Jude Bellingham wanditse amateka mashya