APR FC yasinyishije Umukinnyi mushya ukomoka muri Ghana wigeze kubeshyerwa kugurisha imikino

Ikipe y'Ingabo z'igihugu yasinyishije uyu mukinnyi ukina mu kibuga hagati afasha barutahizamu gusatira amasezerano y'imyaka 2 nk'uko amakuru abivuga.

Richmond Lamptey yavutse tariki ya 18 z'ukwezi kwa 3 mu 1997, avukira mu murwa mukuru wa Ghana i Accra. Atangira gukina ruhago yahereye mu ikipe y'abato ya West African Football Academy y'abatarengeje imyaka 13, maze mu 2015 aza kuzamurwa mu ikipe nkuru.Yahakinnye imyaka 3 ndetse no mu 2017 aza kuyifasha gusoreza ku mwanya wa 3 ,ukaba umwanya mwiza iyi kipe yaribonye mu mateka yayo.

Muri uwo mwaka Richmond Lamptey yakinnye imikino 26 ,atsindamo igitego 1 ndetse anatanga imipira 6 yabivuyemo. Kubera kwitwara neza byatumye aza gushakwa n'amakipe atandukanye gusa ahitamo kwerekeza mu ikipe ya International Allies muri 2018.

Nyuma y'umwaka umwe gusa yahise atizwa mu ikipe ya Lebanese Premier League ariko naho ntiyatindayo aza kugaruka muri International Allies.

Mu mwaka w'imikino wa 2020-21 ,Richmond Lamptey yakinnye imikino 30 ,atsindamo ibitego 3 atanga imipira 4 yabivuyemo ndetse anatsindira ibihembo by'umukinnyi mwiza w'umikino ku mikino 4 itandukanye.

Uyu mukinnyi mu 2021 yaje guhagarikwa amezi 30 azize ibikorwa byo kugurisha imikino ndetse no kugena uko iri bugende gusa aza kujurira birangira akuweho ibihano yari yafatiwe ndetse anishyurwa amafaranga y'impozamarira.

Nyuma yo guhagarikwa ntibyamubujije guhita yerekeza mu ikipe ya Asante Koko aho yari agikina kugeza ubu. Richmond Lamptey yari amaze kuyikinira imikino 51 akaba yaratsinzemo ibitego 4.

Uyu mukinnyi kandi mu 2021 yari yarigeze guhamagarwa mu ikipe y'Igihugu ya Ghana nkuru ayikinira umukino umwe.

Richmond Lamptey yari asanzwe akinira ikipe ya Asante Koko yiwabo

Richmond Lamptey ni umukinnyi mushya wa APR FC mu gihe cy'imyaka 2