Bagarukanye amavuta nyuma y’ubukwe! Brian na Dinah bateguye igitaramo cyabo cya mbere

Tariki 24 Kamena 2023 nibwo Inyarwanda yacyiriye amakuru atariho ivumbi avuga ko umuramyi Brian Blessed yateye intambwe ikomeye akambika impeta umuramyi mugenzi we Dinah Uwera nk’ikimenyetso gihamya urwo yamukunze.

Mu birori byitabiriwe n’inshuti nke zabo za hafi bikabera i Kibuye mu karere ka Karongi mu Kiyaga cya Kivu, Dinah nawe ntiyazuyaje kwemerera Brian kuzamubera umufasha w’ibihe byose, maze abari aho bose babiherekesha amashyi n’impundu.

Ku ya 07 Ukwakira 2023, nibwo Brian yasabye ndetse agakwa umukunzi we Dinah mu birori byabereye kuri Ahava River Kicukiro. Kuri uwo munsi n’ubundi saa saba z’amanywa nibwo abitabiriye ibi birori berekeje kuri Healing Center Church-Remera aho bahamirije imbere y’Imana n’abantu ko bazatandukanywa n’urupfu nk’uko indahiro y’abiyemeje kubana nk’umugabo n’umugore ibivuga.

Nyuma y’ibi birori byari bibereye ijisho ndetse no kubanza kwita ku muryango mushya bari bashinze, Brian na Dinah bagarukanye integuza y’igitaramo kigaruka ku ngaruka zo kuramya Imana bise ‘Impact Worship Live Concert.’ Iki gitaramo kizaba ku ya 30 Kamena 2024.

Mu kiganiro Brian yagiranye na InyaRwanda, yasobanuye impamvu igitaramo cyabo bacyise iri zina. Yagize ati: “ ‘Impact’ bisobanura ingaruka. Habaho ingaruka nziza, hakabaho n’ingaruka mbi mu buzima busanzwe bitewe n'ibyo urimo ukora. Impact Worship rero ni ingaruka nziza ziva mu kuramya Imana, kugirira ibihe byiza no kugirana ubusabane n'Imana, kubohoka no gukira mu marangamutima mu gihe cyo kuramya Imana. Ibi nibyo twifuza kuzagira muri Impact Worship Live Concert.”

Brian yavuze ko ibindi bisobanuro birambuye bijyanye n’aho iki gitaramo kizabera n’abazifatanya n’iyi ‘Couple’ kuri uwo munsi bizagenda bitangazwa nyuma.

Aba bombi, ni abahanga cyane ndetse bakunzwe n’abatari bacye haba mu Rwanda no mu mahanga. Ubuhanga budasanzwe bwa Brian Blessed washyize itafari rikomeye mu muziki wa Niyo Bosco bwamugejeje muri Leta Zunze Ubumwe za Amerika maze ahura n’uwo afata nk’icyitegererezo cye, Kirk Franklin.

Ku rundi ruhande, umufasha we Dinah Uwera nawe yatoranijwe mu baramyi bahuriye kuri ‘stage’  n’umuramyi ukomeye cyane ku isi, Don Moen ubwo aheruka mu Rwanda.

Brian na Dinah barushinze nyuma y’igihe kirekire bakundana ariko barabigize ibanga rikomeye cyane ndetse bagakora n’uko bashoboye bagakwepa ibibazo by’itangazamakuru bifite aho bihuriye n’ubuzima bwabo bw’urukundo. 

Brian Blessed yakunzwe cyane mu ndirimbo “Dutarame” yahuriyemo na Jules Sentore ndetse na Alpha Rwirangira, naho umufasha we Dinah Uwera yamenyekanye mu ndirimbo “Nshuti” yashyize hanze mu 2017 na “Says The Lord” n’izindi.

Brian na Dinah bateguye igitaramo

Nicyo gitaramo cyabo cya mbere bagiye gukorana 

Bagarutse nyuma y'igihe gisaga umwaka bakoze ubukwe

Brian yatangaje ko mu gitaramo cyabo bazagira ibihe byiza byo kuramya, gusabana n'Imana no kubohoka