Mbappé biramusaba kwizirika naho Real Madrid ikihambira! Imibare muri Champions League iri kurwaza umutwe

Nyuma y'uko mu Cyumweru gishize hakinwe imikino ibanza, hakurikiyeho iyo kwishyura. Kuri uyu wa Kabiri Saa Tatu z'ijoro kuri Estadio Olimpico Lluis, Companys ikipe ya FC Barcelona iraba yakiriye Paris Saint-Germain.

Mu mukino ubanza byari byarangiye iyi kipe yo muri Espagne isanzwe ifite ibikombe bya Champions League itsinze ibitego 3-2. 

Ni ibitego byari byatsinzwe na Raphinha kuwa 37,62 ndetse na Christensen kuwa 77 mu gihe Paris Saint-Germain yo yari imbere y'abafana bayo yari yatsindiwe na Ousmane Dembele ku munota wa 48 na Vitinha kuwa 51.

Ubwo bivuze ko Kylian Mbappé utahiriwe n'umukino ubanza asabwa kuza gufasha iyi kipe ye ya PSG itazi uko igikombe cya Champions League gisa gutsinda nibura ibitego 2-0 cyangwa 2-1 ubundi bakajya muri penaliti.

Imibare yerekana ko aya makipe yombi amaze guhura imikino 9 muri Champions League,FC Barcelona ikaba yaratsinzwemo 2 gusa ,itsinda 4 banganya 3.

Umukino Paris Saint-Germain iheruka gutsindira FC Barcelona iwayo byari mu Kwezi kwa 02 kwa 2021 iyiterekamo ibitego 4-1.

Undi mukino uraba uyu munsi Saa Tatu z'ijoro ni uwo ikipe ya Borussia Dortmund iraba yakiriyemo Atletico Madrid kuri Signal Iduna Park. Uyu usa nkaho udakomeye cyane kubera ko ubanza Atletico Madrid yari yatsindiye mu rubugo ibitego 2-1.

Ubwo bivuze ko isabwa kunganya gusa ubundi igakatisha itike ya 1/2 kandi ibifitiye ubushobozi.

Ku munsi w'ejo kuwa Gatatu nibwo umuriro uzaba waka neza haba mu gihugu cy'u Budage ndetse no mu Bwongereza.

Ikipe ya Manchester City izaba yakiriye Real Madrid kuri Etihad Stadium nyuma y'uko umukino ubanza urangiye amakipe yombi anganyije ibitego 2-2 byatsinzwe na Ruben Dias witsinze, Rodrigo na Valverde mu gihe Manchester City yo yari yatsindiwe na Bernado Silva ,Foden ndetse na Gvardiol.

Ikipe ya Real Madrid kugira ngo ikomeze birasa nkaho bigoranye kuko  irasabwa gutsinda cyangwa ikanganya bakajya kuri za penaliti kandi izaba idafite Aurelien Tchouaméni wanafashije mu mukino ubanza ariko akaba yarabonye ikarita ya 5 y'umuhondo.

Mu mwaka ushize ubwo aya makipe nabwo yari yahuriye hano maze umukino ubanza ubera muri Espagne baranganya igitego 1-1 gusa uwo kwishyura Manchester City inyagira ibitego 4-1.

Imibare yerekana ko mu mikino 3 yose iheruka Manchester City yakiriyemo Real Madrid yose yayitsinze.

Bivuze ko gutsinda kuri Real Madrid bigoye dore ko na Kevin De Bryne utarakinnye umukino ubanza  yagarutse.

Undi mukino utegerejwe ku munsi w'ejo Saa tatu z'ijoro ni uwo ikipe ya FC Bayern Munich izaba yakiriyemo Arsenal kuri Allianz Arena. Umukino ubanza wari warangiye ari ibitego 2-2 byatsinzwe na Bukayo Saka na Trossard ndetse na Serge Gnabry na Harry Kane ku ruhande rwa FC Bayern Munich.

Ubwo bivuze ko Arsenal kugira ngo ikomeze isabwa gutsinda cyangwa kunganya bagatera penaliti ibintu bisa nkaho bigoye cyane.

Imibare yerekana ko kuva muri 2020 FC Bayern Munich yakwegukana igikombe cya UEFA Champions League yatsinzwe imikino 3 gusa iri muri 1/4. 

Ikipe ya Arsenal mu mateka yayo yatsindiye FC Bayern Munich ku kibuga cyayo inshuro 1 gusa muri 2013. Icyo gihe hari mu mukino wo kwishyura wa 1/8 iyitsinda ibitego 2-0 bya Olivier Giroud na Laurent Koscielny gusa icyo gihe birangira n'ubundi isezerewe bitewe n'ibitego yari yatsindiwe mu rugo mu mukino ubanza.

Muri rusange imikino imaze kubahuza,FC Bayern Munich yatsinzemo 7, Arsenal itsindamo 3 banganya 3.

Abakinnyi FC Bayern Munich ishobora kuzaba idafite isanzwe igenderaho harimo Kingsley Coman wavunitse igihe cyose gisigaye kugira ngo uyu mwaka w'imikino urangiye,Serge Gnabry,Leroy Sane na Alphonso Davies wahawe ikarita ya 5 y'umuhondo mu gihe Arsenal we nta n'umwe ibura usanzwe ugenderwaho.

Muri iyi mikino yose,uwa FC Barcelona na Paris Saint-Germain ndetse n'uwa Manchester City na Real Madrid yose muzayikurikira ku InyaRwanda mu buryo bwa Live.