Ni umuhanga nka Messi! byinshi kuri Linda Caicedo uri kubica bigacika muri Real Madrid na Colombia mu bagore

Linda Caicedo yabonye izuba ku 25 Gashyantare 2005, avukira mu mujyi wa Candelaria, Valle del Cauca, muri Colombia. Amazina ye yose ni Linda Lizeth Caicedo Alegría, akaba akinira Real Madrid mu bagore, ndetse n'ikipe y'igihugu ya Colombia. 

Uburebure bwa Linda Caicedo ni santimetero 61, (1.61m) akaba akina nka rutahizamu. Ababyeyi be ni Harlinda Alegria na Mauricio Caicedo.

Muri 2011 ubwo Linda Caicedo yari afite imyaka itandatu y'amavuko, ni bwo yatangiye umupira w'amaguru mu mashuri y'abato, awutangirira muri Real Juanchito, yakiniye kugera muri 2016. 

Kuva muri 2016 yagiye muri Generaciones Palmiranas aho yayimazemo umwaka umwe, kuko yayivuyemo muri 2017. Muri 2017 yagiye muri CD Atlas C.P, aho yayivuyemo muri 2019 noneho atangira gukina bya kinyamwuga.

Ku myaka 14 gusa muri 2019, Linda Caicedo yatangiye gukina nk'uwabigize umwuga, atangirira mu ikipe ya América de Cali, aho yayikiniye imikino irindwi ndetse anayitsindira ibitego birindwi.

Kuva muri 2020–2023 Linda Caicedo yahise ajya muri Deportivo Cali, yakiniye imikino 37 ayitsindira ibitego 16. Muri 2023 ni bwo Real Madrid yabengutse Linda Caicedo, ubu amaze kuyikinira imikino 29 yayitsindiye ibitego bitanu. 

Kuva yagera muri Real Madrid, Linda Caicedo nubwo atagitsinda ibitego cyane, ni umwe mu bakinnyi bahabwa amahirwe yo kuzagira ahazaza heza, ukurikije uburyo akina ku giti cye, ndetse akanafasha ikipe akinira ya Real Madrid.

Mu ikipe y'igihugu ya Colombia, Linda Caicedo nabwo ni umukinnyi ukomeye. Mu bakobwa batarengeje imyaka 17, yakiniye Colombia imikino 11 ayitsindira ibitego 9.

Mu batarengeje imyaka 20, yakiniye Colombia imikino ine atsinda ibitego bibiri, naho mu ikipe nkuru y'igihugu ya Colombia yayikiniye imikino 32 amaze kuyitsindira ibitego ikenda.

Ku myaka 19 y'amavuko, Linda Caicedo ni Kapiteni w'ikipe y'igihugu ya Colombia. Ku myaka 19 gusa amaze kubika ibikombe bitatu byose yafashije Colombia kubitwara muri 2022.

Linda Caicedo yafashije ikipe y'igihugu ya Colombia kwegukana Copa America Feminina, igikombe cyari cyakiniwe muri Colombia. 

Muri 2022 kandi yafashije Colombia y'abatatengeje in myaka 17 kwegukana shampiyona ya America y'Epfo mu batatengeje imyaka 17 mu mikino yabereye muri Uruguay, nanone muri 2022 afasha Colombia kwegukana igikombe cy'Isi mu batarengeje imyaka 17 cyabereye mu Buhinde.

Linda Caicedo w'imyaka 19 y'amavuko akomeje guca amarenga ko azaba umunyabigwi mu mupira w'amaguru mu bagore

Muri 2022 Linda Caicedo yafashije Colombia mu ngeri zitandukanye kwegukana ibikombe bitatu 

Ku myaka 19 gusa, Linda Caicedo ni Kapiteni w'ikipe y'igihugu ya Colombia mu bagore