Joe Jonas na Sophie Turner mu nzira ya gatanya

Umwe mu nshuti z’uyu muryango w’ibyamamare za hafi yabwiye ikinyamakuru TMZ ko Joe na Sophie bari basanzwe bafitanye abana babiri, bagiye bahura n’ibibazo bikomeye mu mibanire yabo kuva babana.

Mu mezi atatu ashize, bivugwa ko Jonas ari we witaga ku bana babo bato "igihe cyose" no mu gihe yazengurukaga igihugu hamwe na barumuna be Nick Jonas na Kevin Jonas.

Joe Jonas na Sophie Turner bari mu nzira igana mu rukiko gushaka gatanya

Ibi bije nyuma y’uko Page Six itangaje ko Sophie yagaragaye abyinira mu mbaga kuri Stade Yankee mu ijoro ritangiza urugendo rwa Jonas na barumuna be mu kwezi gushize.

Ariko agatotsi hagati y’aba bombi, katangiye kumvikana muri Gicurasi 2019, kuva bagaragara nta mpeta bambaye mu ruhame.

Baherutse kandi kugurisha inzu yabo iherereye Miami umwaka umwe nyuma yo kuyigura.

Joe na Sophie bagiye gutandukana nyuma y'imyaka ine gusa mu rushako

Umubano wa Joe na Sophie watangiye kumenyekana nyuma y’ibihembo bya Billboard Music Awards 2019 maze babyarana umwana wabo w’imfura, Willa, ubu ufite imyaka ibiri, muri Nyakanga 2020.

Ku ya 1 Werurwe 2022, hatangajwe ko aba bombi bategereje kwibaruka undi mwana wa kabiri, umwana w’umukobwa, wageze ku isi muri Nyakanga.

Ubwo Joe na Sophie biteguraga kwakira umwana wabo wa kabiri byari umunezero

Sophie atangariza ikinyamakuru Elle ibijyanye n’uko bitegura umwana wabo wa kabiri yagize ati: "Twishimiye cyane kwagura umuryango. Ni umugisha uruta indi yose."

Umugabo we wamamaye muri ‘Camp Rock’ yabwiye ikinyamakuru People Magazine ko yumva "afite ubwoba buke" bwo kwakira umwana we wa kabiri.

Joe na Sophie n'abana babo babiri

Yongeyeho ati: "Mu by’ukuri ntuzi icyo uba utegereje… ariko ndishimye."

Bashyingirwa muri 2019 akanyamuneza ari kose

Joe na Sophie bahuye bwa mbere muri 2016, Joe ahita asaba Sophie ko babana nyuma y’umwaka umwe gusa. Muri 2019, barashyingiwe bakomeza kubaho nk’umuryango ariko mu myaka isaga ine bamaranye banyuze muri byinshi.