Ibyaranze umunsi ushyira ku nama ya 73 ya FIFA i Kigali

1. Lambert Maltock yatorewe kongera kuyobora OFC, kuri manda ya kabiri

Ku munsi wo ku wa Gatatu, Perezida wa FIFA, Gianni Infantino wongeye gutorwa, yashimiye Lambert Maltock, Perezida w'Ishyirahamwe ry'umupira w'amaguru ku mugabane wa Australia, rizwi nka OFC (Oceania Football Confederation) wongeye gutorerwa kuyobora iri shyirahamwe mu myaka ine iri imbere.  

Lambert Maltock yatowe bwa mbere muri Werurwe 2019, muri New Zealand. Perezida wa FIFA, Gianni Infantino yashimiye iri shyirahamwe rigizwe n'abanyamuryango 13 barimo babiri badakorana na FIFA - ku byo bagezeho muri iyi myaka ine ishize, agira ati "Uyu mwaka ni muremure ku ishyirahamwe rya Oceania, ku mupira w'amaguru wa bagore no ku banyamuryango 11 ba OFC."

Maltock wongeye gutorerwa indi manda y'imyaka ine yashimiye iri shyirahamwe, agira ati "Twashyize mu bikorwa ingamba twihaye nka OFC zo guteza imbere umupira w'amaguru, zirimo kuzamura ireme ry'umupira w'amaguru binyuze mu marushanwa, gutangiza umupira w'amaguru w'abagore no gutangiza 'OFC Learn' amahugurwa yo kongera ubumenyi ku bijyanye na ruhago."

Maltock yakomeje avuga intego za OFC mu myaka ine iri imbere yatorewe kongera kuyobora, zirimo "Guteza imbere no kwigisha abanyamuryango kugirango hongerwe ubumenyi ku bijyanye n'imiyoborere. Gutangiza shampiyona ya OFC muri 2025, bizazana impinduka muri ruhago yo kuri uyu mugabane no kwimakaza imiyoborere myiza."

Lambert Maltock yatorewe manda ya kabiri yo kuyobora OFC

Inama ya OFC yabereye i Kigali

Rajesh Patel uhagarariye njyanama ya FIFA muri OFC nawe yongeye gutorerwa manda ya kabiri 

2. Infantino yashimiye Amerika y'Epfo ku bwo umusanzu wabo mu gikombe cy'Isi ashimira CONMEBOL 

Kuri uyu munsi kandi, Perezida wa FIFA, Gianni Infantino yashimiye abafana b'umupira w'amaguru muri Amerika y'Epfo, ku bwo uruhare bagize mu gikombe cy'Isi 2022 cyabereye Qatar, mu kiganiro yagiranye n'abayobozi ba CONMEBOL, Ishyirahamwe ry'umupira w'amaguru muri Amerika y'Epfo.  

Infantino yagize ati " Abafana ba Argentina... n'abandi bose bo muri Amerika y'Epfo bitabiriye (Igikombe cy'Isi) n'abagaciro.. bahora bishimye, bambariye gushyigikira ikipe yabo, bafite ishyaka n'icyifuzo byo gushyigikira ikipe y'igihugu yabo."

Ikipe ya Argentina mu gikombe cy'Isi cyabereye i Qatar, yashyigikiwe bikomeye n'abafana bo ku mugabane wa Amerika y'Epfo, bakoze urugendo bagiye kwifatanya nabo mu gutahana itsinzi, ndetse ibikorwa byabo babiherewe igihembo cy'abafana beza (FIFA Fan Award) mu muhango wo gutanga ibihembo bitandukanye bya FIFA ,wabaye muri Gashyantare, i Paris mu Bufaransa.

CONMEBOL igizwe n'abanyamuryango icumi kandi yashimiye Gianni Infantino biteganyijwe ko aza kongera gutorerwa kuyobora FIFA, mu nama ya 73 iri kubere mu mujyi wa Kigali - ku bwo ubufasha adahwema kubaha, ndetse nawe abasezeranye gukomeza kubafasha by'umwihariko mu gikombe cy'Isi cy'abatarengeje imyaka 18 kizabera i Peru mu Gushyingo 2023.

Gianni Infantino yashimiye umuyobozi w'ishyirahamwe rya CONMEBOL

Inama ya CONMEBOL yabereye I Kigali 

3. FIFA yagiranye ibiganiro n'itsinda rya UEFA ryita ku burenganzira bwa muntu

Iyi nama yari iyobowe n'umunyamabanga mukuru wa FIFA, Fatma Samoura ari kumwe n'abanyamuryango bo mu mashyirahamwe y'umupira w'amaguru mu Bubiligi, Denmark, Ubwongereza, Finlande, Ubudage, Ubuholandi, Noruveje, Portugale, Suwede, Ubusuwisi na Wales n'abandi banyamuryango ba FIFA. 

Abitabiriye inama bahawe ikiganiro na Michael Llamas, perezida wa komite ya FIFA ishinzwe uburenganzira bwa muntu n'imibereho myiza y'abaturage - agaruka ku ngingo z'ibikorwa byiza n'iterambere ryakozwe hagamijwe kubahiriza uburenganzira bwa muntu by'umwihariko mu gikombe cy'Isi cya 2022 cya Qatar.

Llamas yakomeje asobanura ko komisiyo yabo izakomeza kwita ku burenganzira bwa muntu, mu marushanwa ategurwa na UEFA ateganyijwe mu bihe biri imbere. Abanyamuryango ba UEFA nabo bashimiye ibiganiro byubaka bagezwaho ndetse ko bazakomeza gukorana bya hafi na FIFA, kugirango umupira w'amaguru ube inzira y'iterambere mu kwimakaza uburenganzira bwa muntu aho bishoboka hose.