Canada: Israel Mbonyi yakoze igitaramo kitabiriwe n’abarimo Adrien, Safi na Ezra-AMAFOTO

Ni mu ruhererekane rw’ibitaramo byiswe "Icyambu Tour". Icyo mu Mujyi wa Vancouver yagikoze ku wa 1 Ukwakira 2022, kitabirwa n’abanyarwanda bahatuye ndetse n’abandi bakunda ibihangano by’uyu muhanzi.

Ni cyo gitaramo cya gatatu uyu muhanzi yari akoze kuva yagera muri Canada. Yabanje gutaramira mu Mujyi wa Edmonton akurikiza Winnipeg.

Yabwiye InyaRwanda ko iki gitaramo yakoreye mu Mujyi wa Vancouver kitabiriwe n’abantu bazwi barimo umuhanzi Safi Madiba, Ezra Kwizera uherutse gushyira ahagaragara album yise ‘Journey’, Olivier Kavutse washinze Prayer House, umuramyi Adrien Misigaro n’abandi.

Israel Mbonyi yavuze ko muri iki gitaramo yaririmbye indirimbo zose ziri kuri album ‘Number One’ nka ‘Icyambu’, ‘Intashyo’ n’izindi.

Ashingiye ku bitaramo amaze gukora, Israel Mbonyi avuga ko "Umuziki wa Gospel urakunzwe cyane hano."

Ubwo yaririmbaga iyi ndirimbo ye yise ‘Icyambu’ umuhanzi w’inshuti ye Adrien Misigaro, yamusanganiye ku rubyiniro amufasha kuyiririmba, binyura benshi.

Ezra Kwizera witabiriye iki gitaramo, yabwiye InyaRwanda ko iki gitaramo cyagenze neza, kandi nibwo bwa mbere yari yitabiriye igitaramo cya Mbonyi.

Yavuze ko Mbonyi ari umuhanzi w’umuhanga ashingiye ku gitaramo yakoreye i Vancouver ndetse n’ibihangano bye yumva mu bihe bitandukanye.

Ati “Igitaramo cyagenze neza. Israel Mbonyi arabizi, ni ubwa mbere nanjye twari duhuye. Kandi yicisha bugufi, ni umuhanga kandi abantu baramukunze.”

Ezra avuga ko iki gitaramo kitabiriwe n’abanyarwanda bavuye imihanda yose yo mu Mujyi wa Vancouver, ku buryo hari abatwaye imodoka amasaha menshi kugira ngo babashe kugera muri iki gitaramo cya mbere Mbonyi yakoreye muri uyu Mujyi.

Uyu munyamuziki avuga ko Vancouver ari ‘umujyi uhenze’ ariko abantu ‘baretse akazi kugira ngo abantu baze bamurebe’.     

Israel Mbonyi yakoze igitaramo cya gatatu mu ruhererekane rw'ibitaramo yise 'Icyambu Tour'    

Israel yataramiye mu Mujyi wa Vancouver, abanyarwanda n'abandi bamushyigikira ku bwinshi    

Israel avuga ko yaririmbye nyinshi mu ndirimbo ze ziri kuri album 'Number One'    

Adrien Misigaro yatunguye Mbonyi baririmbana indirimbo ye yise 'Icyambu''  

Miss Dusa [Uri hagati] mushiki wa Gentil Misigaro yitabiriye iki gitaramo    

ISRAEL MBONYI AHERUTSE GUSOHORA INDIRIMBO YISE ‘YARATWIMANYE’

">