Abantu umunani bapfiriye mu ruzinduko barimo rwo gusura ikirunga cyo mu Burusiya

Ku munsi wo ku wa kabiri w'icyumweru gishize tariki ya 30 Kanama 2022, nibwo itsinda ry'abantu 12 barimo n'abayobora ba mukerarugendo babiri ryatangiye urugendo rwo guterera ikirunga cya Klyuchevskaya Sopka gifite metero 4,754 z'uburebure, kiri mu majyaruguru y'uburasirazuba bwa Kamchatka mu Burusiya.

Aba bakerarugendo baje guhura n'impanuka mu rugendo hagati, bamwe muri bo bagwa ahantu ha metero 4,200. Ibitangazamakuru byo mu Burusiya byatangaje ko abantu batanu bapfuye ku cyumweru tariki ya 4 Nzeri.

Ikurunga cya Klyuchevskaya Sopka cyo mu Burusiya

Ibiro ntaramakuru bya Interfax byaje gutangaza ko kuri uyu wa mbere tariki 5 Nzeri n'abandi batatu bamaze gupfa nk’uko byatangajwe na Minisitiri w'intebe wa Kamchatka, Roman Vasilevsky avuga ko aya makuru yayahawe n'umuyobozi w'ingendo za ba mukerarugendo muri aka gace ikirunga giherereyemo. 

Inkeragutabara zoherejwe gutabara ku cyumweru ariko biba ngombwa ko basubirayo batabagezeho, kubera ko hari umuyaga mwinshi ukabuza kajugujugu zabo kugwa kuko byari biteganyijwe ko baza kumanuka ku butumburuke bwa metero 3,300. Byari biteganyijwe ko basubirayo umunsi ukurikiyeho.

Minisitiri w'ibiza mu gace iki kirunga giherereyemo, yatanze umurongo wo guhamagaraho ku bo mu muryango w'aba bakerarugendo nk’uko yabitangarije ikinyamakuru RIA Novosti ati " Abo mumiryango y’aba bakerarugendo barakomeza guhabwa amakuru y'ibikorwa byo gushakisha no gutabara".  Ndetse haracyari gukorwa iperereza ku cyateye izi mpfu.