Ikipe y’abakinnyi 11 beza mu mboni za Bon Fils Caleb mu myaka 2 yakinnye muri shampiyona y’u Rwanda

Caleb kuri ubu uri mu Rwanda nyuma yuko ikipe yari aherutse gusinyira yo muri Ukraine atayikiniye kubera intambara iri kuberayo, FIFA yahaye uburenganzira abakinnyi ko nibigera tariki ya 07 Mata 2022 ibibazo by’intambara biri muri Ukraine bitarakemuka, abakinnyi b’abanyamahanga bemerewe gusesa amasezerano n’iyi kipe cyangwa bakayakomeza.

Uyu mukinnyi w’Umurundi uheruka gutsindira ikipe y’igihugu y’u Burundi mu mukino wa gicuti, ubu ari gukorera imyitozo muri Kiyovu Sport mu gihe agitegereje ibiganiro n’andi makipe yo hanze mu gihe gukina muri Ukraine bisa n’ibitagishobotse.

Agaruka ku bakinnyi 11 beza bakinanye muri shampiyona y’u Rwanda mu myaka ibiri yahamaze, Caleb yavuzemo Abarundi batatu na we wa Kane ndetse n’umutoza mukuru amugira mwene wabo w’Umurundi.

Abakinnyi 11 bakinanye na Caleb mu mboni ze 2017-19:

Izamu: Kimenyi Yves

Ubwugarizi: Rwatubyaye Abdul, Usengimana Faustin na Manzi Thierry

Hagati: Ange Mutsinzi, Rutanga Eric, Kwizera Pierrot, Muhire Kevin na Nahimana Shassir

Ubusatirizi: Bimenyimana Bon Fils Caleb na Hussein Tchabalala

Umutoza mukuru: Haringingo Francis Christian

Umwungiriza: Robertinho Concalves

Caleb avuga ko bigoye gutoranya abakinnyi 11 kuko abo bakinanye bose bari ku rwego rwiza kandi bose bari abakinnyi beza.

Bimenyimana Bonfils yinjiye muri Rayon Sports 2017 avuye muri Vital’o FC y’i Burundi, ahakorera amateka byanatumye mu 2019 yerekeza muri Rigas FS yo muri Latvia.

Caleb ari mu bakinnyi bakoze amateka akomeye muri Rayon Sports

Caleb kuri ubu ari gukorera imyitozo muri Kiyovu Sport