Ikipe y’igihugu y’umupira w’amaguru ya Gabon ndetse n’iya Maroc ziri kumwe n’u Rwanda mu itsinda rya mbere mu irushanwa rya CHAN 2016 zanganyije ubusa ku busa mu mukino wakurikiye uw’u Rwanda na Cote d’Ivoire.
Ni umukino wa kabiri wabaye mu irushanwa nyafurika rihuza abakinnyi bakina imbere mu buhugu byabo CHAN iri kubera mu Rwanda ukaba n'umukino wa kabiri wo mu itsinda rya mbere rigizwe n'u Rwanda, Gabon, Cote d'Ivoire na Maroc.
Muri uyu mukino, ikipe ya Gabon yakinishaga imbaraga nyinshi mu kibuga yagerageje gutsinda ibitego by’umwihariko mu gice cya mbere gusa amahirwe yabonye ntiyayabyaza umusaruro.
Amakipe yombi yakoze ibishoboka gusa umukino kubona igitego ntibyakunda
Wari umukino w'imbaraga
Mu gice cya kabiri, amakipe yombi yagerageje gusatirana gusa ntihagira ibasha kureba mu izamu ry’indi bituma umukino urangira anaganya ubusa ku busa.
U Rwanda ruyoboye itsinda
Kunganya kwa Gabon na Maroc ubusa ku busa byatumye aya makipe yombi atahana inota rimwe rimwe mu gihe u Rwanda rwo rwari rwabonye atatu yarwo ku mukino wa mbere rwatsinzemo Cote d’Ivoire igitego kimwe ku busa.
U Rwanda, ubu ni rwo ruyoboye itsinda A n’amanota atatu, rukaba ruzigamye igitego kimwe.
Gabon na Maroc ziraza ku mwanya wa kabiri aho zifite buri imwe inota rimwe rimwe ntizigire umwenda cyangwa ngo zigire igitego zizigama.
Cote d’Ivoire iraza ku mwanya wa kane aho ifite amanota 0 n’umwenda w’igitego kimwe.
Ku mukino wa kabiri wo muri iri tsinda rya mbere, U Rwanda ruzakina na Gabon na ho Cote d'Ivoire ihure na Maroc ku munsi wo ku wa gatatu, tariki ya 20 Mutarama 2016 kuri Stade Amahoro.
Irushanwa rya CHAN 2016 rizakomeza ejo ku cyumweru, tariki ya 17 Mutarama 2016 hakinwa imikino ya mbere yo mu itsinda rya kabiri.
Repubulika Iharanira Demokarasi ya Kongo izakina na Ethiopia ku isaha y’I saa cyenda mu gihe Angola izacakirana na Cameroon ku isaha y’I saa kumi n’ebyiri. Imikino yombi ikazabera kuri Stade Huye.
Eng
RSS 
TANGA IGITECYEREZO