Ni iyihe migozi yaziritse The Ben umaze imyaka 6 yibera muri USA akaba atashye akiri icyamamare?

The Ben akigera muri Amerika we na Meddy havuzwe byinshi, hibazwaga niba aba bahanzi koko bazabona aho bakorera indirimbo bitewe nuko abanyarwanda batinyaga ama studio yo muri Amerika. Ibi ariko si ko byagenze kuko nyuma y’igihe gito Lick Lick wari usanzwe abakorera indirimbo i Kigali nawe yahise abasanga muri USA. Yaje gukurikirwa na Cedru wakoreraga aba basore amashusho y’indirimbo nawe wari wamaze kugera muri Amerika bimera nkaho aba bahanzi babonye abavandimwe bituma banzika urugendo rwabo muri muzika, iba intangiriro ya The Ben wahise atangira gukorera umuziki muri Amerika.

The Ben azahurira na Yvan Buravan, Charly na Nina ndetse na Bruce Melody ku rubyiniro

Reba urugendo rufatwa nk’inzira y’inzitane The Ben yanyuzemo mu myaka 6 amaze yibera USA ikamuyobora kugeza ubwo atashye i Kigali akiri icyamamare.

Nyuma y’urugendo rwa The Ben muri USA byamufashe igihe gito yisuganya ubundi atangira umuziki ku buryo bwimbitse, aha uyu muhanzi akaba yarahereye ku ndirimbo yakoze bwa mbere yise “I’m in love” ni indirimbo yakunzwe ndetse iranakurikirwa ku mbuga nkoranyambaga cyane cyane ku rubuga rwa Youtube. Nyuma y’iyi ndirimbo uyu muhanzi ari mu bahanzi bitabiriye Rwanda Day i Boston mu mwaka wa 2012 aba yongeye kwiyereka abanyarwanda muri iki gitaramo cyahuje abanyarwanda baba mu mahanga n’abayobozi b’u Rwanda.

Amaze gukora indirimbo I’m in love The Ben akitabira Rwanda Day i Boston ntiyarekeye aho kuko yahise yongera gukora mu nganzo ashyira hanze indirimbo ‘Give it to me” indi ndirimbo ye yakunzwe yongera kumwibutsa abanyarwanda yaba ababaga mu Rwanda ndetse no hanze yarwo. Iyi ndirimbo ntiyigeze iguma ari yonyine hanze kuko The Ben yahise akora indirimbo yise “Nzaririmba igitangaza” iyi ikaba yarahise ifata imitima ya benshi mu banyarwanda by’umwihariko abasanzwe bakunda umuziki wa Gospel.

The Ben yahise yisunga Meddy na K8 Kavuyo bakorana indirimbo “Ndi uw’ikigali” iyi yabaye imwe mu ndirimbo zakoze amateka yo gukundwa no kubyinwa bikomeye haba mu Rwanda ndetse no hanze ahabaga hateraniye abanyarwanda. Iyi ndirimbo yatumye aba bahanzi bakora ibitaramo byo kuyizengurutsa impande n’impande mu gihugu cya Leta Zunze Ubumwe za Amerika ahabaga hari abanyarwanda baje kwirebera aba bahanzi, aha izina rya The Ben ryari riri kongera kwibika mu mitima y’abanyarwanda batahwemaga kugaragaza ko ubuhanga yari asanganywe akibufite.

The Ben agiye kugaruka mu Rwanda akiri icyamamare nyuma y'imyaka 6

Uyu muhanzi wari umaze kongera kubaka izina mu mitima y’abanyarwanda ndetse n’urukumbuzi rukiyongera  yahise ashyira hanze indirimbo yise “Urabaruta” iyi ndirimbo yahise ifata mu mitwe y’abanyarwanda bari basanzwe bakunda uyu muhanzi. The Ben uzwiho kudatuma abakunzi be bamutegereza cyane yahise ashyira hanze indi ndirimbo yise “I Can See” iyi ndirimbo ituje yafashije uyu muhanzi kuguma mu mitwe y’abakunzi ba muzika.

Nyuma yo gushyira hanze iyi ndirimbo uyu muhanzi yaje gutumirwa mu Muryango w'Abibumbye (UN Headquarters) muri  Mata 2014 ndetse The Ben avuga ko atazibagirwa mu mateka ye igitaramo yahakoreye. Uyu muhanzi yirengaje amezi make akora indirimbo yise “Ko nahindutse” mu mwaka wa 2015 iyi ndirimbo ikaba yaratumye abanyarwanda baba i Kigali bakumbura uyu muhanzi bari bagiye kuzuza imyaka itanu batabona icyakora icyizere cyo kuza mu Rwanda kwe ntikigaragare.

Amaze gushyira hanze “Ko nahindutse” The Ben yakoze indirimbo yafatanyije na Princess Priscillah bise “Ntacyadutanya” iyi ndirimbo yacuranzwe henshi mu tubyiniro tw’i Kigali, ikundwa ku buryo bukomeye. Uko The Ben yashyiraga hanze indirimbo niko byagendaga binugwanugwa ko agomba kuza gutaramira i Kigali gusa ntibikunde.

The Ben yagize gutya yunga mu ryawamugani wa Kinyarwanda ugira uti”Utaganiriye na se ntamenya icyo sekuru yasize avuze “ yaje kwisunga Ben Kayiranga bakorana indirimbo bise “Only You” , iyi nayo yaracuranzwe irakundwa gusa ikiruta byose uyu muhanzi mu minsi ishize yashyize hanze indirimbo yise “Habibi”, ikunzwe kugeza magingo aya i Kigali ndetse na henshi mu Rwanda iyi ikaba ariyo ndirimbo The Ben aherutse gushyira hanze ndetse ikaba arinayo akenyereyeho aza mu Rwanda.

Nyuma y’uru rugendo rukomeye rwo gushyira hanze indirimbo zagiye zikundwa mu myaka 6 The Ben yabajijwe n’umunyamakuru wa Inyarwanda.com ibitaramo yagiye yitabira bikomeye yakunze kurusha ibindi kuva yava mu Rwanda aha akaba yagize ati “Ibyinshi ni ibyo nabaga natumiwemo birimo; UN headquarters, Oklahoma creative forum n’ibindi byinshi yagiye yitabira.”

The Ben uhamya ko yasabwe kuza mu Rwanda inshuro zirenga 15 yaje kwemeza ko azaza mu Rwanda mu mpera z’umwaka wa 2016, ibi byaje kuba kimomo ubwo hasohokaga ibyapa byamamaza igitaramo azitabira cya EAST AFRICAN PARTY, kizaba tariki 1 Mutarama 2017 gitegerezanyijwe amatsiko n’abanyarwanda benshi bakunda uyu muhanzi bikaba byitezwe ko azagera mu Rwanda tariki 19 Ukuboza 2016, ndetse nyuma y’igitaramo uyu muhanzi akazahita asubira muri USA aho asanzwe yibera.

Ngayo nguko nguwo The Ben mu gihe cy’imyaka 6 yibera USA yakozemo indirimbo zamamaye nyinshi ndetse anaca uduhigo two kwitabira ibitaramo bikomeye, ni umuhanzi wagiye USA akunzwe hibazwa byinshi ku hazaza he muri muzika ariko uko iminsi yicumaga akahasubirisha ibikorwa birimo n’indirimbo zamamaye, ibi ni bimwe mubiherekeje uyu musore kugaruka mu Rwanda akiri icyamamare nyuma y’imyaka 6 atagera mu rwamubyaye.

KANDA HANO UREBE AMASHUSHO Y'INDIRIMBO "HABIBI" THE BEN AHERUTSE GUSHYIRA HANZE