Abahanzi bakorera muri Kina Music, ku nshuro yabo ya mbere bahuriye mu ndirimbo “Shikama” ihimbaza Imana. Iyi ndirimbo ikubiyemo ubutumwa buhumuriza abantu bacitse intege kubw’amasezerano yabo yatinze gusohora.
Abahanzi bari muri iyi ndirimbo Shikama,ni Knowless Butera, Christopher,Tom Close na Dream Boys. Nubwo iyi ndirimbo ariyo ya mbere ihimbaza Imana ihuriwemo n’abahanzi ba Kina Music,Producer Ishimwe Clement umuyobozi wa Kina Music yatangarije inyarwanda.com ko muri uyu mwaka wa 2015 bafite gahunda yo gukora indirimbo nyinshi zihimbaza Imana ndetse hari n’izo bazakorana n’abandi bahanzi batari abo mu Rwanda.
Producer Ishimwe Clement umuyobozi wa Kina Music ndetse akaba ariwe wakoze iyi ndirimbo 'Shikama'
Muri iyi ndirimbo bise 'Shikama', mu nyikirizo yayo, abo bahanzi bavuga ko urugendo rugiye kugera ku musozo kandi ngo isezerano niyo ryazatinda ntabwo rizahera. Bati “Shikama,shikama wicika intege tugiye kugerayo tugeze ku musozo,isezerano niyo ryazatinda ariko ntirizahera.”
Aba bahanzi bagize Kina Music bakunze guhurira mu bitaramo bitandukanye,none ubu bahuriye mu ndirimbo ihimbaza Imana
Knowless Butera nawe wumvikana muri iyi ndirimbo, mu ijwi rye akomeza abantu baba barihebye kubera abantu babatega iminsi, ati “Niwumva bagutega iminsi uko bashatse,nubona abantu bose bagushizeho uzinumire,Imana irabibona.”
Tom Close we avuga ko niyo imvura yagwa imisozi igatenguka,isezerano ry’Imana ridashobora guhera mu gihe isaha y’Imana yageze.
Aba ni bamwe mu bahanzi bagize Kina Music iyoborwa na Clement
Andi mu magambo y’inkomezi akubiye muri iyi ndirimbo “Shikama”, aba bahanzi baririmba bavuga ko mbere y’isaha y’Imana ko igera,ngo bajyaga bibwira ko ibibazo byabo birusha Imana kuremera ariko ibyo byose byaterwaga ni uko isaha y’Imana itari yakageze,igikenewe akaba ari ugushikama no kudacika intege kuko isezerano niyo ryazatinda ridashobora guhera.
Kanda hano hepfo wumve "Shikama" indirimbo y'Imana yakozwe n'abahanzi ba Kina Music
Gideon N.M
Eng
RSS 
TANGA IGITECYEREZO