APR FC yabimburiye andi makipe gupimisha abakinnyi n'abandi bakozi bayo COVID-19 - AMAFOTO

Kuri uyu wa Kabiri Tariki 29 Nzeri 2020, abakozi bose b’ikipe ya APR FC bapimwe icyorezo cya COVID-19 nyuma y’itangazo rya Minisiteri ya siporo rikomorera itangira ry’ibikorwa bya siporo mu gihugu hose ryasohotse kuwa Mbere Tariki 28 Nzeri.

Amakuru dukesha urubuga rw'iyi kipe avuga ko iki gikorwa cyabimburiye itangira ry’imyitozo y’ikipe y’Ingabo z’Igihugu yitegura umwaka utaha w’imikino cyabereye ku bitaro bya gisirikare bya Kanombe (Rwanda Military Hospital) saa Tatu za mu gitondo, kikaba kitabiriwe n’ Abakinnyi 31, Abatoza 4 n’abandi bakozi bose bashinzwe ubuzima bwa buri munsi bw’ikipe.

Umwaka utaha w’imikino APR FC ikaba izitabira amarushanwa y’imbere mu gihugu, CECAFA Kagame Cup 2021 ndetse na CAF Champions League. Ikaba ifite intego yo guhatanira ibikombe byose bikinirwa mu Rwanda, CECAFA Kagame Cup ndetse no kugera mu matsinda ya CAF Champions League.

Mu itangazo rya Minisiteri ya Siporo rivuga ko amashyirahamwe yose y’imikino yemerewe gusubukura imyitozo n’amarushanwa nyuma yo kwandikira MINISPORTS ribisaba rikabona kwemererwa.

MINISPORTS yavuze ko ingamba zo kubahiriza amabwiriza yo kwirinda COVID-19 zigomba kuzajya zikurikizwa igihe cyose amakipe agiye gukora imyitozo n’aho bayikorera kugira ngo ubuzima bw’abakinnyi n’abandi bose bubungabungwe.

Umutoza mukuru wa APR FC Adil Mohamed yapimwe COVID-19

Umutoza wungirije Adil nawe yapimwe COVID-19

Kapiteni Manzi Thierry yapimwe COVID-19

Rutahizamu Jacques Tuyisenge yiteguye gutangira umyitozo muri APR FC

Manishimwe Djabel yapimwe COVID-19

Myugariro Mutsinzi Ange nawe yapimwe Coronavirus