RFL
Kigali

Sudan: Abantu 90 bapfuye, ibihumbi mirongo bava mu byabo kubera imyuzure

Yanditswe na: Eric Misigaro
Taliki:2/09/2020 8:51
0

Abantu batari munsi ya 90 bishwe n'imyuzure muri Sudani naho abagera hafi ku 400,000 bagizweho ingaruka, nk'uko bitangazwa n'ikigo cy'umuryango w'abibumbye gihuza ibikorwa by'ubutabazi (OCHA).



OCHA ivuga ko imvura nyinshi yateje imyuzure ndetse n'uruzi rwa Nil ruruzura ku kigero kigera hafi kuri metero 17,5 - ikigero cya mbere cyo hejuru cyane uru ruzi rugezeho mu myaka 100 ishize.

Iki kigo kivuga ko no kubona amazi meza - y'ingenzi mu kugira isuku muri iki gihe cy'icyorezo cya coronavirus - nabyo byagizweho ingaruka.

Igenzura ry'ibanze ryakozwe na ONU/UN rigaragaza ko amasoko y'amazi arenga 2,000 yanduye cyangwa yazibye. Uturere twashegeshwe kurusha utundi turimo nk'uburasirazuba, White Nile, Darfour na Khartoum.

Abaturage babarirwa mu bihumbi za mirongo bataye ingo zabo bacyeneye aho gucumbikirwa byihutirwa n'ubundi bufasha bwihuse. Muri leta ya Khartoum - ari nayo irimo umurwa mukuru - honyine, abantu barenga 21,000 bagizweho ingaruka, ndetse ku cyumweru leta yatangaje ibihe bidasanzwe.

Mu kiganiro n'abanyamakuru ari i Genève mu Busuwisi ejo ku wa kabiri, Jens Laerke, umuvugizi wa OCHA, yagize ati: "Mu gihugu hose, kugeza ku itariki ya 25 y'ukwezi kwa munani, abantu 380,000 bagizweho ingaruka naho 90 barishwe [n'imyuzure]".

Iyo myuzure yanashenye imihanda, bituma bigorana gushyikiriza imfashanyo abaturage bayicyeneye cyane muri iki gihe.

Src: bbc 






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND