Airtel Rwanda
Kigali

Chelsea yasanze Arsenal ku mukino wa nyuma muri FA Cup nyuma yo kwisasira Manchester United

Yanditswe na: SAFARI Garcon
Taliki:20/07/2020 14:13
0

Abakinnyi barimo Giroud, Mount na Maguire bafashije ikipe ya Chelsea FC kunyagira Manchester United ibitego 3-1, ihita ikatisha itike y’umukino wa nyuma muri FA Cup, aho igomba kwesurana n’ikipe ya Arsenal yo yasezereye Manchester City muri ½.



Kuri iki cyumweru tariki 19 Nyakanga 2020, ikipe ya Chelsea yigaranzuye Manchester United yari imaze iminsi yarayifashe ku gakanu, iyitsinda itayibabariye ibitego 3-1 biyifasha kugera ku mukino wa nyuma wa FA Cup ku nshuro ya 14 mu mateka y'iri rushanwa.

Chelsea FC yafunguye amazamu mu minota 11 yongewe ku gice cya mbere cy’umukino ibifashijwemo na rutahizamu Olivier Giroud ku mupira yahawe na Cesar Azpilicueta.

Mason Mount yatsindiye Chelsea igitego cya kabiri ku munota wa 48 ku ishoti rikomeye yateye, umunyezamu David de Gea arawufata ntiyawukomeza uruhukira mu rushundura.

Harry Maguire yitsinze igitego ku munota wa 74 w’umukino, ku mupira wari uhinduwe na Marcos Alonso usanga uyu myugariro aho yari ahagaze ahanganye na Antonio Rudiger aho kuwukura mu izamu ahubwo awushyiramo, Chelsea iba ibonye igitego cya gatatu.

Ku munota wa 85 Manchester United yabonye penaliti ubwo Callum Hudson-Odoi yategeraga mu rubuga rw’amahina Anthony Martial. Bruno Fernandes yinjije penaliti neza, bituma Manchester United ibona igitego cy’impozamarira.

Amakipe yombi abarizwa mu murwa mukuru London, niyo agomba kuzahatanira igikombe cya FA Cup muri uyu mwaka nyuma yo gusezerera amakipe y’i Manchester muri ½.

Chelsea FC yahise yandika amateka yo kugera ku mukino wa nyuma muri FA Cup ku nshuro ya 14, ikaba iri gushaka igikombe cya 9 mu mateka y’iri rushanwa, mu gihe Arsenal bazaba bahanganye ibitse ibikombe 13 bya FA Cup.




Chelsea yanyagiye Manchester United igera ku mukino wa nyuma muri FA Cup

Arsenal yasezereye Man.City izahura na Chelsea ku mukino wa nyuma






TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND