Airtel Rwanda
Kigali

Lesotho yasesekawemo na Coronavirus nk’igihugu muri Afurika yari itarageramo

Yanditswe na: David Mayira
Taliki:13/05/2020 20:48
0

Icyorezo cya Coronavirus ni kimwe mu byorezo bikomeje kwibasira ubuzima bwa benshi ku Isi, gusa hari ibihugu n’ibirwa iyi ndwara itarakandagiramo. Muri Afurika, igihugu cya Lesotho ni cyo kitari cyakagezwemo n'iyi ndwara, gusa magingo aya cyamaze kwemeza umuntu wa mbere wanduye coronavirus.



Nyuma yo kugaragaramo umuntu wa mbere wanduye ubwandu bushya bwa Covid-19, byatumye iki gihugu kiba icya nyuma igezemo ku mugabane wa Afurika.

Iki gihugu cy'imisozi gifite ubutegetsi bwa cyami gitangaje umurwayi wa mbere wa Covid-19, mu gihe Afurika y'Epfo izengurutse iki gihugu uko cyakabaye, yo imaze kwemeza abantu 11,350 banduye Covid-19, indwara y'ubuhumekero iterwa n'ubu bwoko bushya bwa coronavirus. 

Umuntu umwe wanduye coronavirus watangajwe muri Lesotho yabonetse nyuma y'ibipimo byafashwe ku bagenzi 81. Abo bari bavuye muri Afurika y'Epfo no muri Arabie Saoudite, nk'uko itangazo rya Minisiteri y'ubuzima ribivuga.

Mu gihe kibarirwa mu byumweru, hakomeje kumvikana kudashira amakenga ukuntu Lesotho yashoboye kwirinda iki cyorezo n'ubwo bwose hari urujya n'uruza rwinshi hagati yayo na Afurika y'Epfo bituranye.

Nk’uko tubikesha BBC, ababarirwa mu bihumbi amagana mu baturage ba Lesotho bakora akazi gatandukanye muri Afurika y'Epfo. Umupaka ugabanya ibihugu byombi wafunzwe ubwo ibihugu byombi byajyaga mu bihe bidasanzwe bya 'Guma mu rugo' mu mpera y'ukwezi kwa gatatu.

Icyo gihe abakozi bakora imirimo ya nkenerwa cyane ni bo bonyine bemerewe gukomeza urwo rujya n'uruza. Mu kiganiro yagiranye n'igitangazamakuru EyeWitness News cyo muri Afurika y'Epfo mu byumweru bicye bishize, Minisitiri w'imari wa Lesotho, Moeketsi Majoro, yasabye ko abashaka gutahukanwa bavuye muri Afurika y'Epfo bakwihangana bakaba bahagumye.

Yari afite ubwoba ko bamwe bashobora gutahukana iyo virusi. Yavuze ko ibyo byari kuba umutwaro ukomeye ku gihugu gisanzwe gifite urwego rw'ubuvuzi rufite intege nke.

Lesotho ntabwo ifite ubushobozi bwa ngombwa bwo gupima Covid-19, ku bw'iyo mpamvu ibizamini byo kwa muganga biri koherezwa muri Afurika y'Epfo gupimirwayo mu kigo cy'igihugu cyo kurwanya indwara zandura.

Hari bamwe bavuze ko ibi bishobora gutuma habaho gukerererwa atari gusa mu kumenya abanduye no gukumira ikwirakwira ry'ubwandu bw'iyi virusi, ahubwo no gukerererwa mu kuvura abanduye.

Minisiteri y'ubuzima ya Lesotho yagize iti: "Kugeza ubu tumaze kohereza ibizamini by'abantu 597 gupimwa mu kigo NICD, 295 muri bo ntayo banduye, naho kuri 301 turacyategereje ibisubizo".






TANGA IGITECYEREZO

Izina ryawe
Email yawe
Andika igitecyerezo

Inyarwanda Art studio
Inyarwanda BACKGROUND