RFL
Kigali

Abakinnyi ba Rayon Sports biyemeje kwitabaza inkiko ubuyobozi nibutsimbarara ku guhagarika imishahara yabo

Yanditswe na: SAFARI Garcon
Taliki:21/04/2020 12:55
0

Abakinnyi ba Rayon Sports bagaragaje ko batishimiye icyemezo cy’ubuyobozi bw’iyi kipe cyo kubahagarikira imishahara uhereye muri Werurwe 2020, bemeza ko nta bwumvikane bwabayeho, ko ari icyemezo cyafashwe n’ubuyobozi ku bwende bwabo bityo nihatagira igiinduka bakaba bazitabaza ubutabera.



Kapiteni w’ikipe ya Rayon Sports, Rutanga Eric yandikiye Perezida w’ikipe Munyakazi Sadate amumenyesha ko nategera abakinnyi ngo baganire ku byerekeye imishahara babarimo bazitabaza inkiko zikabarenganura.

Kuri uyu wa mbere tariki ya 20/04/2020, ni bwo ubuyobozi bwa Rayon Sports FC bwasohoye ibaruwa ifite umutwe ugira uti,  "Guhagarika umushahara". Iyi baruwa ivuga ko ubuyobozi bw'iyi kipe buhagaritse by’agateganyo umushahara ku bakinnyi bayo kubera ko ubukungu bwayo bwashegeshwe na Coronavirus. Yagiraga iti: 

Dushingiye ku masezerano y’Umurimo dufitanye, dushingiye ku bihe by’icyorezo bya COVID19 igihugu cyacu kirimo ndetse n’isi yose bitatwemerera gukomeza kubahiriza amasezerano y’umurimo dufitanye, nkwandikiye iyi baruwa nkumenyesha ko muri ibi bihe bya Coronavirus, ikipe ya Rayon Sports itazabasha gutanga umushahara kubera kutabasha gukora ibyasezeranywe n’impande zombi, gusa umushahara w’ukwezi kwa kabiri 2020 ikubereyemo ikazakomeza kuwuguha uko ibishoboye. Umushahara uhagaze kuva muri Werurwe kugeza igihe impande zombi zizabasha kongera kuzuza ibiteganywa n’amasezerano y’umurimo dufitanye.

Nyuma y’iyi baruwa, abakinnyi ba Rayon Sports bahagarariwe na Rutanga Eric banditse bamenyesha ubuyobozi ko kuba bwarafashe umwanzuro wo kubahagarikira umushahara batabyumvikanyeho, bityo ko biteguye kwitabaza inkiko.

Bagize bati "Nimuramuka mutisubiyeho ku cyemezo mwafashe, ngo mubanze mutwegere tujye inama, turabamenyesha ko tuzagana inzira z’amategeko aturengera".

Ubuyobozi bwa Rayon Sports buvuga ko abakinnyi n’abatoza n’abandi bakozi bazahembwa ukwezi kwa Kabiri gusa ngo kuko ukwa Werurwe batagukoze ariko abakinnyi ntibabikozwa kuko bavuga ko bagomba guhembwa ukwezi kwa Kabiri n’ukwa Gatatu kuko bagukozemo iminsi 15.


Sadate Munyakazi uyobora Rayon Sports yatangaje ko abakinnyi batazahembwa uhereye muri Werurwe


Abakinnyi bandikiye ubuyobozi babumenyesha ko bagiye kwitabaza inkiko






TANGA IGITECYEREZO

Izina ryawe
Email yawe
Andika igitecyerezo

Inyarwanda Art Studio

Inyarwanda Art studio
Inyarwanda BACKGROUND