Umuryango uharanira uburenganzira bwa muntu Amnesty International wamaganye abayobora Irani kubera guca intoki umugabo wahamwe n'icyaha cyo kwiba.
Abayoboraba Irani bavuze ko uwo mugabo yahamwe n'ibyaha 28
by'ubujura.
Amategeko
ahana ya kisilamu y'igihugu cya Irani avuga ko kwiba "bwa mbere"
bihanishwa gucibwa intoki enye zo ku kiganza cy'iburyo.
Abategetsi ba Irani bakomeje gushyigikira icyo gihano cyo
guca intoki bavuga ko ari bwo buryo bwiza cyane bwo kurwanya ubujura nubwo
cyamaganwe n'imiryango mpuzamahanga iharanira uburenganzira bwa muntu.
Ariko ni gacye cyane hatangazwa amakuru ajyanye n'icyo
gihano.
Saleh Higazi, umuyobozi wungirije wa Amnesty International mu
burasirazuba bwo hagati no muri Afurika y'amajyaruguru, yasohoye itangazo ku wa
kane avuga ko icyo gikorwa kigambiriwe cyo "gukata ibice by'umubiri
by'abantu atari ubutabera".
Yongeyeho ati: "Ni igikorwa cya kinyamaswa ku cyubahiro
cya muntu. Amavugurura mu mategeko ahana ya Irani yasoza iyi migenzereze mibi
cyane amaze igihe kinini ategerejwe".
Ibiro ntaramakuru Mizan by'urwego rw'ubucamanza rwa Irani
byavuze ko icyo gihano cyatanzwe ku wa gatatu w'icyumweru gishize i Sari,
umujyi mukuru w'intara ya Mazandaran.
Uwo mugabo wahamwe n'icyo cyaha ntabwo amazina ye yatangajwe.
Irani ni leta ya kisilamu kandi amategeko yayo ashingiye ku
gukurikiza mu buryo bukaze amategeko ya Sharia.
Mu kwezi kwa mbere mu mwaka wa 2018, abayobora mu majyaruguru
ashyira uburasirazuba bwa Irani baciye ikiganza cy'umugabo w'imyaka 34 wahamwe
no kwiba intama.
Ibihano nk'ibyo kandi byagiye bitangwa muri Arabie Saoudite,
Nigeria na Somalia.
Src: BBC
TANGA IGITECYEREZO